Frá BingBang til AwareGO

Júlíus Fjeldsted hefur verið ráðinn fjármálastjóri hjá netöryggisfyrirtækinu AwareGO. 

Í tilkynningu segir að um sé að ræða nýja stöðu hjá félaginu sem er með starfsemi á Íslandi og í Bandaríkjunum. Þá er sókn inn á evrópska markaði í undirbúningi.

„Hlutverk fjármálastjóra verður meðal annars að halda utan um og styðja við uppbyggingu félagsins, fylgja eftir fjárhagsáætlun félagsins ásamt verkefnum tengdum daglegri fjármálastjórn AwareGO.

Júlíus hefur á undanförnum árum komið að fjölmörgum verkefnum á sviði nýsköpunar og fjármálaráðgjafar. Síðast sem meðstofnandi og fjármálastjóri BingBang Aps í Kaupmannahöfn. Þar áður starfaði Júlíus m.a. sem sjálfstæður ráðgjafi, hjá GAMMA ráðgjöf, Beringer Finance og PwC. Júlíus hefur einnig bakgrunn úr blaðamennsku og reynslu af fjármögnun fyrirtækja.

Júlíus er með MSc próf í fjármálum og alþjóða viðskiptum frá Háskólanum í Árósum,“ segir í tilkynningunni.