Magnús Magnús­son fram­kvæmda­stjóri stefnu­mótunar og rekstrar hjá Högum

Fram kemur í tilkynningu frá smásölufyrirtækinu að Guðrún þekki vel til starfsins en hún gegndi stöðunni fram til ársins 2019. Hún hefur síðan þá starfað sem framkvæmdastjóri rekstrar og samstæðu Haga.

Framkvæmdastjóri stefnumótunar og rekstrar er ný staða innan Haga sem meðal annars ber ábyrgð á stefnumótun og eftirfylgni, viðskiptaþróun og rekstrargreiningum, þar með talið stuðningi við dótturfélög er varðar greiningar og umbótaverkefni. 

Að sögn Haga hefur mikil vinna hefur átt sér stað síðastliðna mánuði við skilgreiningu á áherslum í rekstri og stefnu fyrirtækisins til lengri tíma. Lykilverkefni framkvæmdastjóra stefnumótunar og rekstrar verður að styðja við framhald þessarar vinnu.

Verið samstæðunni innan handar frá því í sumar

Magnús hefur mikla reynslu af stefnumótun og almennum rekstri, bæði hérlendis og erlendis. Hann hefur undanfarið ár starfað sem sjálfstæður ráðgjafi, eftir að hafa leitt stefnumótunarteymi Marel árin þar á undan. 

Þar áður starfaði Magnús sem ráðgjafi hjá alþjóðlega ráðgjafafyrirtækinu McKinsey & Company þar sem Magnús aðstoðaði fjölda alþjóðlegra fyrirtækja með stefnumótun, rekstrarumbætur og stærri umbreytingar, og enn áður hjá hugbúnaðarfyrirtækinu AGR Dynamics. Magnús er með M.Eng. gráðu í iðnaðarverkfræði og aðgerðagreiningu frá UC Berkeley í Kaliforníu, og B.Sc. gráðu í iðnaðarverkfræði frá Háskóla Íslands.

Finnur Oddsson, forstjóri Haga segir Magnús hafa starfað náið með Högum og dótturfélögum en hann hefur verið í hlutverki ráðgjafa frá því í sumar. 

„Magnús þekkir vel til allrar okkar starfsemi og þess sem framundan er og býr að dýrmætri reynslu úr fyrri störfum við að koma á breytingum sem skila viðskiptavinum og eigendum ávinningi. Við bjóðum Magnús sérstaklega velkominn í hópinn og væntum mikils af samstarfinu,” er haft eftir Finni í tilkynningu.