Ramos á leið undir hnífinn

Ramos, fyrirliði Spánarmeistara Real Madrid, hefur verið að glíma við meiðsli undanfarið og neyðist nú til að leggjast undir hnífinn til að fá bóta sinna mein. Spænski blaðamaðurinn Miguel Ángel Díaz staðfesti þetta á Twitter-síðu sinni í dag.

Ramos verður frá í sjö vikur hið minnsta og mun missa af leikjum gegn Atalanta í Meistaradeild Evrópu ásamt átta leikjum í spænsku úrvalsdeildinni.

Um er að ræða mikið högg fyrir lið Zinedine Zidane en liðinu gekk bölvanlega í þeim leikjum sem Ramos missti af fyrr á þessari leiktíð.

Samningur hins 34 ára gamla miðvarðar við Spánarmeistara Real rennur út í sumar og hefur hann verið orðaður við önnur lið undanfarið. Ramos hefur verið í herbúðum Real frá árinu 2005 og átt einkar farsælan feril, hvort sem um er að ræða með Real eða spænska landsliðinu.