„Nei, mér er ekki í nöp við Dag B. Eggertsson“

Mynd Gunnars Karlssonar birtist í laugardagsútgáfu Fréttablaðsins og Vigdís borgarfulltrúi Miðflokksins deildir henni samviskusamlega á sinni Facebooksíðu. „Mynd segir meira en þúsund orð,“ segir Vigdís og Ólafur, sem reyndar var sá sem vakti athygli Vigdísar á myndinni, setur inn svohljóðandi athugasemd: „Ég myndi setja Turbó í þennan bíl hjá Vigdísi, eins og búið er að gera í Formulu 1...“

Vísi hafa borist ábendingar um að hér sé Ólafur á hálum ís; að hann bara geti ekki leynt andúð sinni á borgarstjóranum, og sé þarna að gefa til kynna að helst ætti að aka yfir hann. Ólafur lenti í honum kröppum þegar hann setti tjáði sig um hitamál, þegar kom á daginn að för eftir byssukúlur voru á bíl borgarstjóra.

„Byrjaðu á sjálfum þér... Hér er afleiðing af því sem hampað hefur verið frá svokalaða hruninu 2008. Nú er byltingin komin heim og þú verður bara að taka því Hr. borgarstjóri.“ Ýmsir voru á því að um væri að ræða sérlega ósmekkleg ummæli. Ólafur, sem baðst afsökunar á þeim, telur reyndar að þarna hafi verið vel í lagt, við að túlka ummælin á einn veg.

Ekki í nöp við borgarstjóra

Ólafur svarar spurningu blaðamanns, hvort honum sé í nöp við Dag, afdráttarlaust:

„Neinei, mér er ekki í nöp við hann. Ég þekki hann ekkert þannig en menn takast á í pólitíkinni. Ég skil ekki að menn megi ekki gera smá grín. Það var talið grín þegar Dóra Björt [Guðjónsdóttir borgarfulltrúi Pírata] vildi lykla bíla. Hún sagðist bara vera að gera grín. Ég segi bara: Þetta er grín. Mér finnist þetta skrambi fín mynd. Vigdís ætti að komast sem lengst á þessum bíl, það var nú hugsunin.“

Ólafur telur þau sem tilheyra meirihlutanum geta leyft sér flest en ef á þau er andað verði andskotinn laus. Honum finnst fólk ekki samkvæmt sjálfu sér í því. Ólafur telur það fráleita túlkun á ummælum hans að hann vilji að ekið sé yfir borgarstjóra, sú sé meiningin. Þetta sé á engan hátt beint gegn Degi. „Þetta var grínmynd og ég svaraði því í gríni. Svo er annað mál að menn eiga ekki að vera að þvælast um með hraðahindranir inná kappakstursbraut. Þar eru engar hraðatakmarkanir.“

Fyrrverandi Formúla 1 dómari

Ólafur segir ástæðuna fyrir því að hann fór í stjórnmál á sínum tíma vera einmitt umferðarmálin. Sem hann segir að séu í miklum ólestri í borginni. Og meirihlutinn sé á miklum villigötum í þeim málaflokki. Þá segir Ólafur að ummæli hans séu að einhverju leyti innblásin af því að hann var að horfa á „formúluna“ um helgina, fín keppni.

„Ég var að dæma í Formúla 1, dæmdi einhverjar 20 keppnir og er eini Íslendingur sem hefur verið þar. Hef orðið svo frægur að reka Lewis Hamilton heim. Þetta voru 60 keppnir sem ég dæmdi allt í allt í kappakstri fyrir FIA, alþjóða bílasambandið,“ segir Ólafur sem á langan feril að baki í akstursíþróttum og stjórnarstörfum í tengslum við þær.