„Öfgalaus maður sem vill samfélaginu vel“

Sigmar Guðmundsson kveður svið fjölmiðlanna eftir 30 ára starf, þar af 23 á RÚV. Hann er í öðru sæti á lista Viðreisnar í Suðvesturkjördæmi fyrir komandi Alþingiskosningar, á eftir Þorgerði Katrínu Gunnarsdóttur formanni flokksins.

Tilfinningin að vera staddur í viðtali við blaðamann sem stjórnmálamaður er skrýtin, segir Sigmar. „En skrýtnast fannst mér að segja upp á RÚV eftir allan þennan frábæra tíma,“ segir hann.

Ertu að koma út úr skápnum sem hægrimaður?

„Ja, ég vona alla vega að fólk hafi ekki getað lesið sérstaklega mikið í skoðanir mínar á störfum mínum hingað til. En við erum auðvitað þannig fjölmiðlamenn að við höfum skoðanir á ýmsu,“ segir Sigmar. Nú sé kominn tími til að prófa að vera hinum megin við borðið og láta til sín taka.

Sigmar segir brotthvarf sitt úr fjölmiðlunum ekki dæmi um hefðbundinn spekileka úr þeirri stétt; heldur hafi hann staðið sína plikt. „Ég er búinn að vera lengi í hinu, fengið að gera ótrúlega mikið af skemmtilegum hlutum, en nú tekur við nýtt og mjög spennandi verkefni,“ segir Sigmar.

Frjálslyndi lykilorð

Frjálslyndi er lykilorð í störfum Viðreisnar, sem Sigmar segir að rími mjög vel við hans hugsjónir.

„Ég er mjög hrifinn af því hve sterkt það orð kemur fram í störfum flokksins og svo er ég eindreginn talsmaður þess að það þurfi að gera eitthvað í gjaldmiðlamálunum hérna. Það er búið að venja okkur við þá hugsun að hér séu bara alltaf háir vextir og verðbólga, en það er ekki lögmál.

Síðan eru alls kyns almennar pælingar eins og um að gæta almannahagsmuna en ekki sérhagsmuna og býsna margt annað,“ segir Sigmar.

Sigmar hefur fulla trú á að hann komist inn á þing, en Viðreisn náði tveimur mönnum inn í kjördæminu í síðustu kosningum. 

„Ég hefði aldrei sagt upp á RÚV nema ef ég hefði fulla trú á að komast inn á þing og ég held raunar að Viðreisn eigi góðan möguleika á að ná inn þriðja manni í kjördæminu,“ segir Sigmar.

Þriðji maður á lista Viðreisnar í Kraganum er Elín Anna Gísladóttir verkfræðingur.

Sigmar sagði upp á RÚV í gær, eftir að hafa fengið það staðfest frá uppstillingarnefnd í fyrradag að svona yrði listinn. Nú er hann hættur í útsendingum, gengur frá lausum endum á næstu dögum og mætir síðan til leiks í pólitíkina. Og væntanlega í fjölmiðlana, en þá í nýju hlutverki sem skotspónn.