Segja leiðtoga Boko Haram hafa framið sjálfsvíg

Þetta segja menn úr klofningssamtökunum ISWAP í yfirlýsingu en þeir fullyrða að leiðtoginn, Abubakar Shekau, hafi framið sjálfsmorð í þann mund sem árás ISWAP á búðir Boko Haram var að bera árangur. 

Þetta er hinsvegar hvorki í fyrsta né annað skiptið sem Abukakar hefur verið sagður dáinn og hvorki Boko Haram né nígerísk yfirvöld hafa viljað staðfesta fregnirnar. 

Abubakar Shekau tók við stjórnartaumunum í Boko Haram árið 2009 eftir að stofnandi samtakanna dó í haldi lögreglu. Síðan hafa samtökunum vaxið ásmegin mjög og hafa hrottalegar aðferðir þeirra vakið óhug um allan heim. 

Þá hafa samtökin staðið að baki fjölmennum mannránum þar sem skólabörnum hefur verið rænt og þau hneppt í þrældóm.