Óli Jóh hefur ekki unnið gamla lærisvein sinn í síðustu sjö leikjum

Heimir Guðjónsson og Ólafur Jóhannesson mætast í kvöld sem þjálfarar Vals og FH þegar liðin mætast í fyrsta leik elleftu umferðar Pepsi Max deildar karla í knattspyrnu.

Þeir hafa áður mæst í innbyrðis leik þessara liða en þjálfuðu þá hitt liðið, Heimir lið FH og Ólafur lið Vals. Nú er Heimir með Valsliðið en Ólafur nýtekinn aftur við FH-liðinu.

Það þarf að fara meira en sex ár aftur í tímann til að finna leik þar sem Ólafur Jóhannesson hafði síðast betur á móti Heimi Guðjónssyni í Pepsi Max deildinni.

Það var í leik Vals og FH 17. maí 2015. Valur vann þá 2-0 sigur þökk sé tveimur mörkum Sigurðar Egils Lárussonar. Það var í fyrsta sinn sem Ólafur stýrði liði á móti FH síðan að hann hætti haustið 2007 eftir að hafa unnið fjóra fyrstu stóru titla félagsins.

Heimir tók við af Ólafi og FH vann sex stóra titla til viðbótar undir hans stjórn.

Ólafur tók við Val sumarið 2015 og undir hans stjórn vann Hlíðarendaliðið fjóra stóra titla á fyrstu fjórum tímabilunum. Ólafur hætti með Valsmenn eftir 2019 tímabilið og Heimir tók við.

Heimir gerði Val að Íslandsmeisturum á fyrsta ári alveg eins og hann hafði gert þegar hann tók við FH liðinu af Ólafi fyrir 2008 tímabilið.

En frá þessum leik á Hlíðarenda í byrjun fyrsta tímabils Ólafs með Valsmenn þá hefur lítið gengið í leikjunum á móti hans gamla lærisveini.

Þetta eru núna orðnir sjö deildarleikir í röð þar sem Ólafur hefur ekki náð að fagna sigri á móti Heimi og stigin eru 15-3, Heimi í vil í þessum sjö leikjum.

Leikur Vals og FH hefst klukkan 19.15 og verður sýndur beint á Stöð 2 Sport. Pepsi Max Upphitun hefst á sömu stöð klukkan 18.45 og eftir leikinn gerir Pepsi Max Stúkan hann upp á Stöð 2 Sport.