Innlent

Vilja sjá Odda rísa á ný sem menningar- og fræðasetur

Kristján Már Unnarsson skrifar
Frá Oddahátíð um helgina. Gammabrekka, sú sem hæst stendur, sést lengst til vinstri.
Frá Oddahátíð um helgina. Gammabrekka, sú sem hæst stendur, sést lengst til vinstri. Arnar Halldórsson

Áform um endurreisn Odda á Rangárvöllum með byggingu Sæmundarstofu, nýrrar kirkju og tónlistarhúss voru kynnt á Oddahátíð um helgina samtímis því sem Sinfónuhljómsveit Suðurlands kom fram á sínum fyrstu opinberu tónleikum.

Áætlað er að hátt í þrjúhundruð manns hafi sótt Oddahátíð á laugardag en þar var boðið upp á guðsþjónustu, veitingar, ræðuhöld og tónleika. Þótti við hæfi að þessi merki sögustaður skyldi vera valinn sem vettvangur fyrir fyrstu opinberu tónleika nýjustu sinfóníuhljómsveitar landsmanna, en myndir frá hátíðinni voru sýndar í fréttum Stöðvar 2.

Fjölmennt var í Odda á Rangárvöllum á laugardag. Hér bjuggu foringjar Oddaverja, helstu valdaættar Sturlungaaldar.Arnar Halldórsson

Hápunkturinn var frumflutningur Sinfóníuhljómsveitar Suðurlands, með Karlakór Rangæinga, Kvennakórnum Ljósbrá, félögum úr Kammerkór Rangæinga og Eyjólfi Eyjólfssyni tenórsöngvara, á lagi Gunnars Þórðarsonar við kvæði Matthíasar Jochumssonar, Á Gammabrekku. Matthías samdi kvæðið um Odda en hann var þar prestur um sex ára skeið.

Afsteypa af Sæmundi á selnum, styttu Ásmundar Sveinssonar, er í Odda. Hún vísar til þjóðsögunnar um það hvernig Sæmundur fróði átti að hafa, með aðstoð Kölska, komist til Íslands frá námi í Frakklandi og hreppt Odda.Arnar Halldórsson

„Þetta eru fyrstu svona opinberu tónleikar, segjum við. Síðastliðið haust spiluðum við á grunnskólatónleikum, fórum í grunnskóla,“ segir Guðmundur Óli Gunnarsson, stjórnandi Sinfóníuhljómsveitar Suðurlands.

„En við erum hérna með átján hljóðfæraleikara í dag. Og stefnum á tónleika á næsta vetri með talsvert fleiri hljóðfæraleikurum."

Guðmundur Óli Gunnarsson, stjórnandi Sinfóníuhljómsveitar Suðurlands.Arnar Halldórsson

Þess var minnst að þrjátíu ár eru frá því félag um endurreisn Odda var stofnað. Helsti frumkvöðullinn og fyrsti formaður Oddafélagsins, Þór Jakobsson, segir að takmarkið hafi verið að kynna gullöld Oddaverja og sögu staðarins síðan.

Félagið beitir sér nú fyrir því að þar rísi menningar- og fræðasetur í nafni Sæmundar fróða sem og stór kirkja sem jafnframt þjóni sem tónlistarhús héraðsins.

Þór Jakobsson, fyrsti formaður Oddafélagsins.Arnar Halldórsson

„Við lítum svo á að slík stofnun eigi hvergi betur heima en í Odda. Vegna sögu staðarins annarsvegar og hinsvegar vegna miðlægrar staðsetningar hér í héraðinu,“ sagði Ágúst Sigurðsson, núverandi formaður Oddafélagsins, í hátíðarræðu.

„Og við hlökkum mjög til þess, - þeirrar framtíðar,“ segir Guðmundur Óli, stjórnandi Sinfóníuhljómsveitarinnar.

Hér má sjá frétt Stöðvar 2:

Menning Tónlist Þjóðkirkjan Rangárþing ytra Skóla - og menntamál Íslensk fræði

Tengdar fréttir

Oddi á Rangárvöllum í þjóðbraut á ný með brú til Vestur-Landeyja

Hið forni höfuðstaður, Oddi á Rangárvöllum, er aftur kominn í alfaraleið með nýrri brú yfir Þverá, sem styttir verulega leiðina milli Rangárvalla og Vestur-Landeyja. Brúin er 93 metra löng og reist í samstarfi sveitarfélagsins Rangárþings ytra og Vegagerðarinnar.

Ný kirkja byggð í Odda og Sæmundarstofa

Mikil uppbygging er framundan á Odda á Rangárvöllum því þar á að fara að byggja nýja kirkju og Sæmundarstofu til heiðurs „Sæmundar Fróða“. Oddi var á öldum áður eitt mesta höfðingja- og menntasetur á Íslandi og þar ólst upp meðal annarra Snorri Sturluson.

Mest lesið


Fleiri fréttir

Sjá meira


×

Mest lesið