Hafa fundið þriðja líkið á K2

Akhbar Syed, framkvæmdastjóri ferðaþjónustufyrirtækisins Lela Peak, er staddur í grunnbúðum K2 og staðfestir þetta í samtali við Explorers Web. Garret Madison, sem fer fyrir gönguhópnum sem fann líkin, staðfesti fyrr í dag að hópur hans hafi fundið tvö lík fyrir ofan fjórðu búðirnar. 

Sagði hann þá að líkin tvö væru af Ali Sadpara og John Snorra og virðist því vera sem lík Mohr hafi fundist.  Madison og samferðamenn hans eru á leið upp á topp K2 og munu að öllum líkindum ná þangað á morgun. Það er fyrsta sinn síðan þremenningarnir fórust í febrúar sem nokkur fer hærra en þriðju búðirnar. 

Sajid Sadpara, sonur Ali, komst upp í fjórðu búðirnar í dag ásamt samferðamönnum sínum Elia Saikaly og Pasang Kaji Sherpa. Explorer Web  segir að óstaðfestar fregnir hermi það að líkin hafi fundist við botn flöskuhálsins, sem er í um 8.200 metra hæð en fjallið er 8.611 metra hátt.