Skýrslu um loftslagsvána beðið með eftirvæntingu

Í skýrslunni segir meðal annars að ekki verði hægt að snúa við mörgu af því sem mannkynið hafi gert loftslaginu á næstu hundruð eða jafnvel þúsundum ára. 

Skýrslan er sögð vera mjög svört en þó fela í sér einhverja vonarglætu. 

Hún er unnin af IPCC, alþjóðlegum rannsóknarhópi á vegum Sameinuðu þjóðanna og byggir á rúmlega 14 þúsund rannsóknum vísindamanna alls staðar að úr heiminum. Er hún sögð fela í sér allra nýjustu forsendur um þróun loftlagsins á næstu áratugum. 

Síðasta stóra skýrsla IPCC kom út árið 2013 en vísindamenn segja að þeir hafi lært mikið síðan þá. 

Skýrslan verður aðalumræðuefni leiðtoga 196 ríkja á loftlagsráðstefnu Sameinuðu þjóðanna í Glasgow í Skotlandi í nóvember en hún er talin marka tímamót varðandi möguleika mannkynsins í að snúa þróuninni við.