Kardinálarnir tróna á toppnum en mörg lið að hitna í NFL

Fimm lið voru með þrjá sigra í fyrstu þremur umferðunum en þrjú þeirra töpuðu í fyrsta sinn í gær. Það voru lið Los Angeles Rams, Denver Broncos og Carolina Panthers. Arizona Cardinals vann sinn leik og Las Vegas Raiders spilar síðan í nótt.

Fjögur lið eru aftur á móti á þriggja leikja sigurgöngu en það eru Buffalo Bills, Baltimore Ravens, Dallas Cowboys og Green Bay Packers. Öll töpuðu þau í fyrstu umferðinni en hafa svarað því með þremur góðum sigrum.

Hér fyrir neðan má sjá öll snertimörkin í leikjunum í gær.

Mest sannfærandi sigur gærdagsins var án efa 40-0 sigur Buffalo Bills á Houston Texans. Bills liðið er á svaka skriði en liðið hefur unnið síðustu þrjá leiki sína 35-0, 43-21 og svo 40-0 í gær. 118-21 í þremur leikjum.

Kardinálarnir fengu alvöru próf á útivelli á móti öðru ósigruðu liði en fóru á kostum undir forystu leikstjórnandans Kyler Murray. Arizona Cardinals vann 37-20 sigur á Los Angeles Rams þar sem hlauparinn James Conner skoraði tvö snertimörk.

Maður dagsins var kannski Tyreek Hill, útherji Kansas City Chiefs, sem var með þrjú snertimörk og 186 jarda í 42-23 sigri liðsins á Philadelphia Eagles. Eins gott að vera ekki með hann á bekknum í Fantasy. Patrick Mahomes átti alls fimm snertimarkssendingar en Höfðingjarnir höfðu tapað tveimur fyrstu þremur leikjum sínum.

Baltimore Ravens endaði sigurgöngu Denver Broncos með 23-7 sigri og Pittsburgh Steelers tapaði sínum þriðja leik í röð nú á móti Green Bay Packers.

Kúrekarnir frá Dallas enduðu þriggja leikja sigurgöngu Carolina Panthers með 26-28 sigur og hafa unnið alla þrjá leiki sína nema þann fyrsta á móti meisturunum í Tampa Bay Buccaneers.

Tom Brady setti nýtt met í sendingajördum í 19-17 sigri Tampa Bay Buccaneers á hans gamla heimavelli hjá New England Patriots en Buccaneers vann á vallarmerki. Heimamenn í Patriots fengu vallarmarkstilraun í lokin en sparkið fór í stöngina og út.

New York liðin unnu bæði í framlengingu en þetta var fyrsti sigur tímabilsins hjá þeim báðum. New York Jets vann 27-24 sigur á Tennessee Titans þökk sé vallarmarki Matt Ammendola sem og því að Randy Bullock klikkaði á 49 jarda vallarmarki þegar fáar sekúndur voru eftir.

Hlauparinn Saquon Barkley tryggði 27-21 sigur á New York Giants með því að skora laglegt snertimark í framlengingunni. Giants lenti 21-10 undir í leiknum en skoraði sautján síðustu stig leiksins þar af var Barkley með tvö snertimörk.