Tré lífsins fær grænt ljós á bálstofu í Garðabæ

Bálstofa Trés Lífsins verður önnur bálstofa sem reist verður hér á landi en fyrir er bálstofa við Fossvogskirkju sem hefur verið starfrækt í 73 ár.

Í tilkynningu frá Tré Lífsins segir að það starfi óháð trúar- og lífsskoðunarfélögum og þjónusta þess verði öllum opin.

Aðstaða Tré Lífsins í Rjúpnadal verður um 1500 fermetrar að stærð og mun hýsa athafnarrými, kyrrðarrými og kveðjurými auk bálstofunnar. Í minningargarðinum verður hægt að gróðursetja ösku ásamt trjám sem vaxa munu upp til minningar um ástvini sem fallnir eru frá.

„Samþykki Sýslumanns er stór áfangi í verkefni sem miðar að því að skapa nútímalega og umhverfisvæna aðstöðu sem verður bylting frá núverandi fyrirkomulagi,“ segir í tilkynningu.