Cuadrado hetja Juventus

Juventus, stærsta lið ítalskrar knattspyrnu, hefur farið hræðilega af stað á tímabilinu. Fyrir leikinn sátu þeir í tíunda sæti deildarinnar með fimmtán stig. Heilum sextán stigum á eftir toppliðunum, AC Milan og Napoli. Fiorentina voru í örlítið betri stöðu með þremur stigum meira.

Eftir bragðdaufan fyrri hálfleik þá færðist fjör í leikinn í þeim síðari. Nikola Milenkovic, leikmaður Fiorentina, fékk að líta sitt annað gula spjald og þar með rautt á 73. mínútu og Juventus sótti án afláts í kjölfarið.

Þeim tókst svo að lokum að koma boltanum í markið í uppbótartíma. Juan Cuadrado fékk þá boltann á hægri vængnum, lék upp endalínuna og átti fast skot úr þröngu færi sem söng í netinu. Vel gert hjá Cuadrado en Pietro Terracciano, markvörður Fiorentina, mun væntanlega eiga erfitt með svefn í nótt. Bæði liðin eru með 18 stig eftir 12 umferðir.