Jónatan: Þetta er það sem ég veit að býr í liðinu mínu

Liðið var aðeins með 4 stig úr fyrstu sex leikjunum fyrir viðreign kvöldsins en Fram með 8 stig. KA tók forystuna snemma í leiknum og hélt henni í kringum fimm mörkin nær allan leikinn. Lokatölur 37-33 KA í vil.

Undirritaður spurði Jónatan strax hvort það væri ekki mikill léttir að fá sigur í dag?

„Jú það er frábær tilfinning, langt síðan að síðasti kom og ég var bara mjög ánægður með sigurinn og ánægður með mína menn. Hrikalega ánægður með mannskapinn í dag.”

Um miðbik fyrri hálfleiks breytti KA stöðunni úr 7-6 í 12-6 á rúmlega fjögurra mínútna kafla sem gerði heimamönnum auðveldara fyrir til þess að klára verkið.

„Mér fannst við vera varnarlega mjög góðir í allan fyrri hálfleik nánast og mér fannst við í raun geta farið með meira forskot inn í hálfleikinn en við náðum aðeins að keyra á þá þarna og þá kom smá forskot. Seinni hálfleikurinn var svona frekar skrítinn en 37 mörk skoruð og það dugar yfirleitt til þess að vinna.”

Leikurinn endar 37-33 sem er nokkuð hátt skor og vill Jónatan meina að tempóið í seinni hálfleik hafi meðal annars valdið því en segir varnarleikinn í fyrri hálfleik hafa verið góðan.

„Það kom meira tempó í seinni hálfleiknum hjá báðum liðum. Framararnir þurftu að reyna saxa á þetta þannig að það var miklu meira tempó og fleiri sóknir í seinni hálfleik en varnarleikurinn og markvarslan datt þá líka aðeins niður í seinni hálfleik þannig að varnarlega vorum við ekki eins góðir eins og tölurnar segja.”

„Það sem ég tek úr þessu núna er bara að það er gott að vinna, gott fyrir okkur, gott fyrir leikmennina, gott fyrir áhorfendur, það var frábær stuðningur hjá okkur eins og oft og það er það sem við verðum að byggja á. Við erum í stigasöfnun og tökum það úr þessum leik; ánægður með frammistöðuna og eitthvað til að byggja á fyrir næstu leiki.”

KA hefur ekki byrjað mótið nægilega vel en virtust hafa nýtt landsleikjapásuna vel til þess að slípa sig saman.

„Já við náttúrulega gerðum það og svo auðvitað náttúrulega fórum við aðeins í það að slípa okkur saman. Okkur hefur eðlilega ekki fundist við ná góðum takti í þessum síðustu leikjum en það býr mikið í liðinu mínu og mér fannst mínir menn bara svara því núna.”

„Það voru margir góðir og margir að leggja inn og við vorum að fá framlag frá mörgum og það er það sem ég er mest ánægður með og bara vongóður um að við getum haldið þessari frammistöðu áfram því þetta er það sem ég veit að býr í liðinu mínu.”

Ólafur Gústafsson byrjaði leikinn í dag á því að negla inn fyrstu þremur mörkum KA og hélt svo dampi út leikinn með því að skora 8 mörk úr 11 skotum.

„Hann tók fleiri skot núna heldur en í undanförnum leikjum og það er líka svolítið það að hann fékk færin í dag og hann spilaði mjög vel ásamt fleirum”, sagði Jónatan að lokum sáttur með stigin tvö.

Olísdeildirnar í handbolta eru á Stöð 2 Sport en upplýsingar um útsendingar má finna hér. Olísdeildin er hluti af Stöð 2 Sport Ísland sem kostar 3.990 krónur á mánuði.