Segir að Anníe Mist hafi átt næstum því eins tilkomumikinn feril og Toomey

Anníe Mist hefur án nokkurs vafa gulltryggt nafn sitt meðal þeirra allra bestu í sögu CrossFit íþróttarinnar með frammistöðu sinni á árinu 2021. Það sést líka á stemmningunni í greininni „Why Annie Thorisdottir’s Career is (Almost) as Impressive as Tia-Clair Toomey’s“ á þekkta CrossFit netmiðlinum Morning Chalk Up.

Anníe hefur komist á verðlaunapall á tveimur af stærstu mótum ársins og það ári eftir að hafa eignast dótturina Freyju Mist. Hún fylgdi þriðja sætinu á heimsleikunum með því að vinna silfur á Rogue Invitational stórmótinu.

Enn meðal þeirra bestu eftir þrettán ár

Anníe hefur í raun aldrei verið betri en auðvitað hefur samkeppnin aukist mikið frá því að hún steig fyrst fram á sjónarsviðið. Það er því enn magnaðri staðreynd að löngu eftir að hennar „kynslóð“ er hætt að keppa þá er Anníe enn að fóta sig vel meðal þeirra bestu í heimi. Anníe er 32 ára gömul og þrettánda ári að stunda ein mest krefjandi íþrótt í heimi.

Blaðmaður Morning Chalk Up fór því að velta fyrir sér hvaða CrossFit kona ætti tilkomumesta ferilinn í sögunni og það ætti að vera auðveld spurning að svara eða hvað?

Ástralinn Tia Clair Toomey hefur eignað sér fyrsta sætið á flestum listum með því að vinna heimsmeistaratitilinn fimm ár í röð og oftast með miklum yfirburðum. Hann taldi þó ástæða til að minna menn á afrekaskrá Anníe.

Toommey sjaldan þurft að hafa eins mikið fyrir sigri

Anníe minnti líka Tiu á sig á Rogue Invitational á dögunum þar sem íslenska ofurkonan var í forystu fyrir lokadaginn. Toomey vann á endanum en hefur sjaldan þurft að hafa eins mikið fyrir sigri á móti á síðustu árum.

Anníe vann hug og hjörtu allra með slíkri endurkomu en hún var þarna að komast í sjötta sinn á verðlaunapall á heimsleikunum.

Anníe Mist er líka mikill brautryðjandi í íþróttinni og enn á fullu þrettán árum eftir að hún byrjaði að keppa. Áhrif hennar á íþróttina eru gríðarleg síðan að hún varð sú fyrsta til að vinna tvo heimsleika í röð árið 2012.

Framkoma Anníe, bros hennar og útgeislun sama hvernig gengur, hefur heillað alla upp úr skónum frá fyrstu tíð en um leið setti hún tóninn sem fyrirmynd þeirra sem eftir komu.

Sú langnæstbesta

Afrekaskráin, talin í heimsmeistaratitlum og stigum, er því Toomey mikið í hag en þegar kemur að svo mörgu í sögu og þróun CrossFit íþróttarinnar þá er íslenska CrossFit konan svo mikill áhrifavaldur.

Blaðamaður Morning Chalk Up viðurkennir að það sé ekki hægt að ganga framhjá Tiu Clair Toomey sem þá bestu í sögunni en um leið ættu allir að vera sammála um það að Anníe sé sú langnæstbesta.

Það er hægt að lesa greinina alla hér en hún er þó læst fyrir aftan áskriftarvegg Morning Chalk Up síðunnar.