Aðeins svekktir Portúgalar gætu bjargað strákunum okkar ef þeir tapa

Íslenska landsliðið er vissulega með fullt hús stiga en önnur úrslit í B-riðli hafa ekki fallið með liðinu.

Staðan er því þannig að ef að Ísland tapar með meira en eins marks mun gegn Ungverjalandi í dag, og Holland vinnur Portúgal, þá er Ísland úr leik. Allar aðrar niðurstöður skila Íslandi áfram í milliriðil.

Í rauninni mæli ég einfaldlega með því við lesendur að láta staðar numið hér. Setningin hér að ofan segir allt sem segja þarf. Lesið hana bara aftur. Hér að neðan eru vissulega frekari útskýringar en þær gætu dugað til að æra óstöðugan.

Þú vilt samt lesa áfram? Allt í lagi. Staðan er sem sagt ekkert frábær og ekki bætir úr skák að ef að Ísland tapar fyrir Ungverjalandi í fyrri leik dagsins þá hefur Portúgal ekki lengur að neinu að keppa í leik sínum við Holland, í leik þar sem Ísland þyrfti að treysta á sigur Portúgala. Því miður fara leikirnir ekki fram á sama tíma, eins og þekkist til dæmis í riðlakeppni stórmóta í fótbolta.

Ísland gæti endað fyrir neðan Holland en tekið með sér fleiri stig

Góðu fréttirnar eru þær að Ísland er með örlögin í sínum höndum og sigur gegn Ungverjalandi, eða bara jafntefli, skilar liðinu með eitt eða tvö stig áfram í milliriðilinn erfiða.

Ef Ungverjaland vinnur með eins marks mun kemur reyndar upp sú athyglisverða staða að ef að Holland vinnur svo Portúgal þá enda Hollendingar efstir í riðlinum og Íslendingar í 2. sæti, en Íslendingar færu samt með tvö stig áfram í milliriðil (stigin úr sigrinum á Hollandi) og Hollendingar ekkert.

Hollendingar alltaf öruggir áfram með sigri

Ef að Ungverjaland og Holland vinna í dag þá enda Ungverjaland, Ísland og Holland með 4 stig hvert en Portúgal neðst án stiga. Þá ræður innbyrðis markatala úr leikjum Ungverjalands, Íslands og Hollands því hvaða tvö lið komast áfram.

Hollendingar eru öruggir um að komast áfram með sigri gegn Portúgal, því innbyrðis markatala þeirra úr leikjum við Ísland og Ungverjaland er +2 (eftir 31-28 sigur á Ungverjalandi en 29-28 tap gegn Íslandi).

Gætu fallið úr leik vegna fjölda skoraðra marka

Ef Ungverjaland vinnur Ísland með einu marki þá kemst Ísland áfram jafnvel þó Holland vinni Portúgal. Ísland væri þá með innbyrðis markatöluna 0 en Ungverjaland -2.

Ef Ungverjaland vinnur hins vegar Ísland með tveggja marka mun, og Holland vinnur Portúgal, þá enda Ísland og Ungverjaland bæði með -1 í samanlagðri innbyrðis markatölu (Holland áfram með +2). Ungverjar færu hins vegar áfram vegna fleiri skoraðra marka en Íslendingar í innbyrðis leikjum þeirra og Hollendinga (þar myndi þá muna aðeins einu marki).

Stærri en tveggja marka sigur Ungverjalands myndi svo auðvitað sömuleiðis skila Ungverjum áfram, með Íslandi eða þá Hollandi ef Holland vinnur Portúgal.

Portúgal treystir á Ísland í dag

Það var því sem sagt ekkert sérlega gott fyrir Ísland að Holland skyldi vinna óvænta 31-28 sigurinn á Ungverjalandi í fyrsta leik. Maður væri heldur ekki með hjartað í buxunum ef að Ungverjum hefði ekki tekist að vinna Portúgala með sigurmarki á lokasekúndunni. Jafntefli í þeim leik eða sigur Portúgals hefði þýtt að Ísland væri þegar komið áfram.

Þess má svo geta að Vilhelm Neto, Retro Stefson bræður, og aðrir stuðningsmenn portúgalska landsliðsins treysta á sigur Íslands í dag. Sigri Ísland Ungverjaland þá á Portúgal nefnilega enn von og dugar raunar að vinna 2-3 marka sigur gegn Hollandi til að fylgja Íslandi áfram í milliriðlakeppnina.