Handbolti

Lærisveinar Aðalsteins taplausir í seinustu fjórum | Bjarki markahæstur í tapi

Hjörtur Leó Guðjónsson skrifar
Aðalsteinn Eyjólfsson og lærisveinar hans í Kadetten eru á góðu skriði í Evrópudeildinni í handbolta.
Aðalsteinn Eyjólfsson og lærisveinar hans í Kadetten eru á góðu skriði í Evrópudeildinni í handbolta. Getty/Andreas Gora

Íslendingar voru í eldlínunni í tveimur leikjum sem var rétt í þessu að ljúka í Evrópudeildinni í handbolta. Aðalsteinn Eyjólfsson og lærisveinar hans í Kadetten unnu góðan tveggja marka sigur gegn Sporting, en Bjarki Már Elísson og félagar hans í Lemgo töpuðu gegn Benfica.

Heimamenn í Kadetten byrjuðu af miklum krafti og náði fljótt fimm marka forystu í stöðunni 8-3. Þeir misstu forskoti þó frá sér og fóru einu marki undir inn í hálfleikinn.

Mikið jafnræði var með liðunum í síðari hálfleik, en undir lokin fóru heimamenn að síga fram úr. Þeir náðu fimm marka forskoti á ný þegar stutt var til leiksloka, en gestirnir skoruðu seinustu þrjú mörk leiksins. Niðurstaðan varð því tveggja marka sigur Kadetten, 26-24.

Sigurinn lyfti Kadetten upp fyrir Sporting í D-riðli, en liðið situr nú í fjórða sæti með átta stig eftir sjö leiki. Liðið hefur ekki tapað í seinustu fjórum leikjum sínum í Evrópudeildinni, og þar af eru þrír sigrar.

Þá máttu Bjarki Már Elísson og félagar hans í Lemgo þola fimm marka tap gegn Benfica, 35-30. Bjarki Már Elísson var markahæsti maður vallarins með níu mörk, en það dugði ekki til.

Lemgo situr í fjórða sæti B-riðils með átta stig eftir sjö leiki, þremur stigum minna en Benfica sem situr í öðru sæti.

Handbolti

Mest lesið


Fleiri fréttir

Sjá meira


×

Mest lesið