Feginn að losna við grímuna: „Pabbi, þú ert kominn með flösu á nefið“

Það var líklega fáum brugðið þegar ráðamenn fluttu landsmönnum margboðuð tíðindi um allsherjarafléttingu sóttvarnartakmarkana í hversdagslegu spjalli í Ráðherrabústaðnum í hádeginu í dag.

„Við erum að endurheimta eðlilegt líf og erum komin á þann stað að við teljum okkur geta lifað með þessari veiru,“ sagði Katrín Jakobsdóttir forsætisráðherra.

Munum ekki geta komið í veg fyrir allar afleiðingar allra smitsjúkdóma

Þetta er í annað skipti sem öllu er aflétt - síðast var það gert í lok júní á síðasta ári. Þá benti Þórólfur Guðnason réttilega á að þetta væri ekki alveg búið.

„Það var sumum sem fannst ég vera leiðinlegi gaurinn en öðrum sem fannst ég bara góði og skemmtilegi gæinn. Ég bara minni á að þetta er ekki alveg búið. Í fyrsta lagi er bylgjan ekki búin, við höfum ekki náð hápunkti í henni og þurfum að huga að því hvort komi aðrar bylgjur með öðrum afbrigðum. Að því leyti er þetta ekki búið en við erum betur stödd núna en síðast þegar ég hafði þessi varnaðarorð,“ segir Þórólfur.

Heilsugæslan er hætt að taka PCR-próf á Suðurlandsbraut og hefur skipt yfir í hraðpróf. Slík próf getur maður líka tekið hjá einkaaðilum og ef maður greinist er maður ekki sendur áfram í PCR. Maður sér síðan sjálfur um að einangra sig.

„Það er mælst til þess að fólk verði heima og ég held að allir hafi bara svolítið gott af því ef þeir finna fyrir einkennum að fara vel með sig og vera heima á meðan þeir eru veikir,“ segir Ragnheiður Ósk. 

Þórólfur minnir á að fólk þurfi enn að passa sig. „Það er fullt af öðrum sýkingum sem fólk getur fengið og veikst alvarlega, þannig að við munum aldrei geta komið í veg fyrir það. En ég held að við séum að gera þetta eins vel og mögulegt er, en við munum aldrei geta komið í veg fyrir allar afleiðingar allra smitsjúkdóma. Það er alveg ljóst,“ segir Þórólfur.

Löngu orðið tímabært

Almenningur virðist sáttur með breytingarnar, þótt sumir lýsi yfir áhyggjum af viðkvæmari hópum.

„Þetta er náttúrulega bara frábært. Löngu orðið tímabært. Ég er með rekstur og ég ferðast mikið, og nú finnst mér ég vera bara frjáls eins og fuglinn fljúgandi. Ég er að fara til London á föstudaginn að sjá mína menn í Liverpool taka Chelsea á Wembley. Það er bara þannig,“ segir Ólafur Geir Magnússon.

Sigfús Sigurðsson, fisksali og handboltahetja, segist feginn að geta fellt grímuna loksins: „Dóttir mín sem er að verða níu ára horfir stundum á mig og segir pabbi, þú ert kominn með flösu á nefið. Það er ekki mjög sexý.“