Fær 200 milljónir punda til að eyða í nýja leik­menn

Í gær greindi Vísir frá því að tiltekt væri þegar hafin innan raða Manchester United þar sem tveir háttsettir menn er kemur að því að finna nýja leikmenn eru horfnir á braut. Þá hefur verið talað um að tíu til tólf leikmenn séu á förum frá félaginu.

Fjöldi leikmanna er að renna út á samning og þá er stefnt að því að selja þónokkra leikmenn sem Ralf Rangnick, tímabundinn þjálfari liðsins, telur ekki nægilega góða. Eflaust er Ten Hag hafður með í ráðum.

Þeir Paul Pogba, Jesse Lingard, Juan Mata, Edinson Cavani og Lee Grant renna allir út á samning í sumar. Þá er talið að fjöldi leikmanna sé til sölu.

Samningur serbneska miðjumannsins Nemanja Matic mun einnig renna út í sumar þar sem félagið samþykkti að rifta samningi hans að tímabilinu loknu þó svo að hann ætti að gilda til sumarsins 2023. Talið er að Matic fari í opinn faðm José Mourinho í Rómarborg. Yrði það í þriðja skiptið sem hann spilar undir stjórn Mourinho.

Samkvæmt frétt Sky Sports mun Ten Hag fá allt að 200 milljónir punda til að eyða í nýja leikmenn og þá er ekki talið með það fjármagn sem gæti komið í kassann við sölur á leikmönnum.

Að lokum segir á vef Sky Sports að Man United hafi samþykkt að borga Ajax tvær og hálfa milljón punda fyrir bæði Ten Hag sem og aðstoðarmann hans Mitchell van der Gaag.