Arnar biðst af­sökunar eftir Vikuna með Gísla Marteini

Þetta segir Arnar Gunnlaugsson, þjálfari Víkings í Bestu deild karla, í yfirlýsingu á Facebook í kjölfar gagnrýni á ummæli sem hann lét falla í þættinum Vikunni hjá Gísla Marteini á föstudag. Hann biðjist innilegrar afsökunar ef einhver upplifði særindi eða vonbrigði vegna orða sinna. 

Arnar var einn þriggja gesta í þættinum en þar var meðal annars til umræðu mál unglingspilts sem lögregla hafði í tvígang afskipti af í tengslum við leit af strokufanga. Unglingspilturinn var alls ótengdur málinu en átti það sameiginlegt með hinum eftirlýsta að vera dökkur á hörund.

„Sérstaklega var ég ósáttur við sjálfan mig vegna einstakra orða sem ég notaði. Mér til varnar, þá er alltaf stressandi að vera í beinni útsendingu, sama hversu vanur þú ert og orð eru sögð sem hljóma illa og endurspegla ekki endilega meininguna,“ segir Arnar en hann hefur meðal annars verið gagnrýndur fyrir að hafa notað orðið svertingi.

„Staðreyndin er sú að ég hef búið í mörgum löndum og eignast marga vini af öllum kynþáttum og sem aðhyllast mismunandi trúarbrögðum. Það hefur aldrei skipt mig neinu máli vegna þess að í mínum huga er fólk bara fólk, óháð litarhætti eða hvaða Guð viðkomandi tilbiður, nú eða ekki.“

Antirasistarnir, hópur þriggja kvenna sem hefur frætt fólk um kynþáttafordóma og mismunun á Íslandi, hefur sérstaklega gagnrýnt eftirfarandi ummæli sem Arnar lét falla í Vikunni:

„Ég er búinn að búa í Frakklandi mikið meðal fransks fólks og svertingja og þess háttar og ég bara, ég hef aldrei einhvern veginn orðið vitni að einhverjum alvöru rasisma.“

Viti vel að rasismi leynist víða

Arnar segir í yfirlýsingunni á Facebook-síðu sinni sem hann birti í morgun að blessunarlega hafi hann ekki mikið orðið var við rasisma í sínu umhverfi.

„En það er ekki þar með sagt að ég geri mér ekki fullvel grein fyrir því að rasismi leynist víða. Þetta kom ekki fram og það var rangt af mér að ljást að nefna það því það sýnir virðingarleysi gagnvart fólki sem hefur lent í fordómum sökum húðlitar, trúarbragða eða skoðanna. Það sem ég var að reyna að koma frá mér, en gerði ekki næginlega vel, er að umburðarlyndi gagnvart rasisma er á undanhaldi þó betur megi ef duga skal.“

Á Twitter-síðu Antirasistanna, sem samanstanda af aðgerðasinnunum Önnu Sonde, Kristínu Reynisdóttur, og Valgerði Kehinde Reynisdóttur er Arnar sagður hafa grafið undan upplifunum alls litaðs fólks og notað orð „sem ekki eigi að nota um manneskjur.“

„Við erum svart fólk. Ekki svertingjar. Að nota svona talsmáta er ekki ásættanlegt og að opna inn á þessa umræðu þar sem enginn gestanna hefur upplifað þá fordóma sem að litaður einstaklingur mætir, á ekki að gerast,“ segir í færslu Antirasista.

Arnar segir að íslenskt samfélag verði fjölskrúðugra með hverju árinu. 

„Börnin okkar alast upp af þeim sökum án fordóma og það er okkar sem eldri eru að halda því þannig. Vildi bara koma þessu á framfæri og biðjast innilegrar afsökunar ef einhver upplifði særindi eða vonbrigði vegna orða minna.“