Nökkvi: Ég vissi að þetta myndi enda inni

„Annar leikurinn í röð sem þetta endar í svona mikilli dramatík, endar á víti og ég set hann inn þannig að mér líður greinilega mjög vel á Dalvík.”

Nökkvi var búinn að eiga tvö stangarskot fyrr í leiknum og KA fjögur í heildina. Auk þess fékk Nökkvi fleiri fín færi.

„Þetta var eiginlega svona leikur, þetta var sláin út og stöngin út og svo var bjargað á línu frá Dusan (Brkovic) og þetta virtist ætla að enda sem sláin út leikur en svo fengum við þetta víti og ég vissi að þetta myndi enda inni.”

Það kemur fyrir að KA leyfi andstæðingnum að hafa boltann og nota svo hraðann fram á við til að skapa usla. Nökkvi segir þennan leikstíl henta sér ágætlega.

„Það hentar mér alveg fínt, ég er snöggur og það nýtist mér kannski vel en við getum alveg haldið boltanum, við áttum bara að vera miklu hugrakkari að halda boltanum í dag því þegar við héldum boltanum vorum við að skapa okkur og við sýndum það í seinni hálfleik og öll hættulegu færin komu hjá okkur þannig að við þurfum bara að vera hugrakkari.”

KA liðið er enn ósigrað eftir fimm leiki með fjóra sigra og eitt jafntefli. Það kemur Nökkva ekkert á óvart.

„Við förum í hvern einasta leik til þess að vinna hann þannig að við gátum alveg séð þetta fyrir okkur”, sagði Nökkvi kokhraustur að lokum.