Má ekki spila á HM vegna samnings við rúss­neskt fé­lags­lið

Rybus, sem hefur leikið 66 landsleiki með Póllandi gerði samning við Spartak Moskvu fyrir einungis níu dögum síðan, þann 11. júní.

Pólska þjóðin hefur staðið með Úkraínu gegn innrás Rússa inn í landið frá upphafi. Pólverjar voru fyrstir til að neita að spila gegn Rússlandi í umspili um laust sæti á HM í Katar en Pólverjar fengu Svía og Tékka með sér í lið sem varð að lokum til þess að Rússum var meinuð þátttaka í öllum keppnum á vegum FIFA.

Pólverjar hafa einnig tekið á móti meira en 3,5 milljón flóttamönnum frá Úkraínu en löndin tvö deila landamærum.

Maciej Rybus spilaði með Lokamotiv Moskvu frá árinu 2017 áður en hann skipti yfir til Spartak í júní. Vera Rybus hjá Lokamotiv stóð ekki í vegi fyrir að leikmaðurinn væri kallaður upp í pólska landsliðshópinn sem vann Svíþjóð í umspili um laust sæti á HM í mars.

Þessi 32 ára gamli leikmaður varð þó að draga sig úr þeim landsliðshóp vegna kórónuveirusmits og hefur hann ekki verið kallaður aftur inn í hópinn síðan þá.

„Landsliðsþjálfarinn [Michniewicz] hefur upplýst leikmanninn [Rybus] að vegna stöðu hans í félagsliði sínu þá verði hann ekki kallaður upp í næsta landsliðshóp í september né í hópinn sjálfan fyrir HM í Katar,“ er sagt í tilkynningu frá pólska knattspyrnusambandinu. BBC greinir frá.

Pólland er með Mexíkó, Sádi-Arabíu og Argentínu í riðli á HM.