Leiknir getur sent FH í fall­­sæti með sigri á Kefla­vík

Það má með sanni segja að FH megi muna sinn fífil fegurri en í dag. Það hefur bókstaflega ekkert gengið hjá félaginu nú virðist botninum endanlega vera náð. Þó liðið hafi ekki orðið Íslandsmeistari síðan árið 2016 þá hefur ekkert lið orðið jafn oft meistari á þessari öld.

Leikmannahópur liðsins er ekki fullkominn en liðið er þó stútfullt af reynslumiklum leikmönnum. Þeir virðast hins vegar engan veginn ná saman, skiptir litlu hvort Ólafur Jóhannesson sé þjálfari eða Eiður Smári Guðjohnsen.

Ólafur tók við stjórnartaumunum á nýjan leik í júní á síðasta ári og var þar enn er Besta deildin hófst í vor. Það var snemma ljóst að það yrði við ramman reip að draga í Hafnafirði en liðið vann aðeins einn af fyrstu fimm leikjum sínum í deildinni.

Á endanum var ákveðið að láta Ólaf fara eftir 2-2 jafntefli gegn Leikni Reykjavík í Kaplakrika þann 16. júní. Um var að ræða fyrsta leik eftir landsleikjahlé og var Ólafi svo gott sem sagt upp inn í klefa eftir leik.

Í kjölfarið var Eiður Smári ráðinn sem þjálfari liðsins í annað sinn en hann hafði upphaflega hætt eftir að vera ráðinn aðstoðarþjálfari íslenska karlalandsliðsins. Þá var Sigurvin Ólafsson fenginn inn sem aðstoðarmaður Eiðs Smára og var talið að þeir tveir gætu blásið nýju lífi í FH-liðið.

Svo reyndist heldur betur ekki og ef eitthvað er hefur FH farið aftur á bak síðan Ólafur var látinn taka poka sinn. Alls hefur liðið spilað sjö leiki í deild og einn í bikar. Eini sigurinn kom í bikarnum er 2. deildarlið ÍR lá í valnum, lokatölur þar 6-1 FH í vil. Árangur í deildinni hins vegar, hann er vægast sagt dapur.

Sjö leikir, þrjú stig og aðeins tvö mörk skoruð. FH hefur nú farið fimm deildarleiki án þess að skora mark. Síðasta mark liðsins gerði Steven Lennon þann 4. júlí í 1-1 jafntefli við Stjörnuna.

Þetta skelfilega gengi þýðir að FH er í bullandi fallbaráttu þegar farið er að draga á síðari helming Bestu deildarinnar. Eftir leik kvöldsins eiga flest lið deildarinnar eftir sex leiki en sum, þar á meðal bæði liðin fyrir neðan FH að svo stöddu, eiga sjö leiki eftir.

Fari svo að Leiknir vinni Keflavík verður FH í fallsæti þegar síðastnefnda liðið á aðeins sex leiki eftir þangað til deildinni verður skipt upp.

Á sama tíma og FH ætlaði sér að vera í harðri baráttu um Evrópusæti og mögulega að gæla við titilbaráttu er liðið ekki aðeins í neðri helming Bestu deildarinnar, það er í bullandi fallbaráttu. Fari svo að gengi liðsins batni ekki snarlega þá gæti endað með því að talað verður um Lengjudeildarlið FH.

Leiknir Reykjavík tekur á móti Keflavík klukkan 19.15 í kvöld. Leikurinn er sýndur beint á Stöð 2 Sport og hefst útsending klukkan 19.00.