Stór­leikur sem bæði lið verða að vinna

Bæði lið eru að koma úr erfiðum Evrópuverkefnum og þá eru skörð höggvin í bæði lið. Víkingar féllu úr Sambandsdeild Evrópu eftir framlengdan leik í Póllandi á meðan Breiðablik fór til Tyrklands í ærið verkefni og féll þar sömuleiðis úr leik.

Bæði leið hafa leikið þétt undnafarnar vikur enda var þarna um að ræða þriðju umferð undankeppni Sambandsdeildairnnar og þá höfðu Víkingar farið í gegnum eina umferð í Meistaradeild Evrópu. Það má því ætla, þó hvorugur þjálfarinn vilji viðurkenna það, að það sé smá þreyta komin í bæði lið.

Bæði lið verða að öllum líkindum án lykilmanna í kvöld en Ísak Snær Þorvaldsson fór ekki með Blikum til Tyrklands þar sem hann er að glíma við afleiðingar heilahristings. Þetta staðfesti hann sjálfur í spjalli við Fótbolti.net. Það munar um minna en Ísak Snær hefur verið með betri leikmönnum landsins í sumar.

Hjá Víkingum er miðvörðurinn Halldór Smári Sigurðsson fjarri góðu gamni en hann hefur ekki spilað deildarleik síðan 1. júlí. Hann tók engan þátt í einvígí Víkings og Lech Poznan né einvíginu gegn The New Saints frá Wales þar á undan. Ásamt Halldóri Smára hefur Nikolaj Hansen verið að glíma við meiðsli og Ari Sigurpálsson hefur fundið fyrir verk í hné.

Þrátt fyrir þessi skakkaföll munu bæði lið stilla upp öflugum byrjunarliðum og það verður án efa sótt til sigurs á Kópavogsvelli í kvöld. 

Staðan er einfaldlega þannig að heimamenn geta náð 8 stiga forystu á KA sem er óvænt komið upp í 2. sæti Bestu deildarinnar á meðan Íslandsmeistarar Víkings geta jafnað KA að stigum með sigri. Þá eiga meistararnir líka leik til góða og með sigri þar gætu þeir minnkað forystu Breiðabliks niður í aðeins tvö stig þegar lítið er eftir af hefðbundinni keppni Bestu deildarinnar. 

Sigur Breiðabliks gefur liðinu mjög gott forskot sem væri erfitt að sjá liðið glutra neiður þó enn séu fimm umferðir eftir af hefðbundinni deildarkeppni sem og úrslitakeppni [þar sem efstu sex liðin spila innbyrðis og neðstu sex spila innbyrðis]. Að því sögðu hafa Blikar nú tapað þremur leikjum í röð, tveimur gegn İstan­bul Başakşehir og einum gegn Stjörnunni. Fari svo að þeir tapi fjórða leiknum í röð þá gæti það sest á sálina hjá leikmönnum liðsins. 

Sigur Víkinga myndi því ekki aðeins gefa þeim trú á því að þeir geti unnið titilinn annað árið í röð heldur einnig skap mikinn glundroða í Kópavogi. Að sama skapi þurfa Víkingar sigur þar sem KA er búið að hirða af þeim 2. sæti og lærisveinar Ólafs Jóhannessonar á Hlíðarenda virðast vera að vakna af værum blundi.

Þó enn sé átta stiga munur á Hlíðarendapiltum og lærisveinum Óskars Hrafns Þorvaldssonar þá þekkja fáir þá kúnst að vinna titla betur en Ólafur Jóhannesson og eftir 6-1 sigur Vals á Stjörnunni virðast lærisveinar Ólafs til alls líklegir. 

Leikur Breiðabliks og Víkings er á dagskrá Stöð 2 Sport klukkan 19.15. Upphitun hefst 45 mínútum fyrr eða klukkan 18.30. Að leik loknum verður svo farið yfir allt það helsta sem gerðist í Stúkunni.