For­­maður knatt­spyrnu­deildar Víkings ó­­sáttur: „Eins ó­­í­­þrótta­­manns­­legt og það verður“

Leikur gærkvöldsins var gríðarlega mikilvægur fyrir stöðu mála í deildinni en með sigri hefði Breiðablik getað náð einkar góðri forystu á toppi deildarinnar. Liðið er vissulega enn með pálmann í höndum sér en Víkingar eiga leik til góða og gætu sett pressu á toppliðið fari svo að hann vinnist.

Leikurinn í gær var litaður af því að bæði lið voru örþreytt eftir gríðarlegt álag undanfarnar vikur og erfiða Evrópuleiki á fimmtudaginn var. Það lýsti sér kannski best í því að Víkingar þurftu að gera tvær skiptingar í fyrri hálfleik vegna meiðsla á meðan Breiðablik missti einnig mann af velli og þurfti að gera aðra í hálfleik.

Arnar Gunnlaugsson, þjálfari Víkings, nefndi þreytumerkin í viðtali eftir leik og þá sérstaklega að menn hefðu verið seinir í tæklingar og því um líkt vegna þess. Það sást á fjölda gulra spjalda sem fór á loft og þá fékk Damir Muminovic sitt annað gula spjald er hann virtist renna á vellinum.

Þrátt fyrir allt þetta þá snerist umræðan á samfélagsmiðlinum Twitter um eitthvað allt annað, þar voru krakkarnir sem sækja boltann er hann fer út af í fyrirrúmi. Heimir Gunnlaugsson, formaður knattspyrnudeildar Víkings lét eftirfarandi ummæli falla:

„Að nota boltasækjara á þennan hátt er eins óíþróttamannslegt og það verður. Vona að menn sem fyrirskipa þetta séu stoltir af sér.“

Hörður Ágústsson, sem hefur meðal annars verið fjölmiðlafulltrúi á leikjum Víkings í sumar, svaraði: „Hrikalega vandræðalegt fyrir lið í Bestu Deildinni að haga sér svona.“

Þetta virðist hafa farið í taugarnar á einhverju stuðningsfólki þar sem bent hefur verið á að hinir ýmsu aðilar hafi látið miður falleg orð falla í stúkunni í garð þeirra krakka sem sinna starfi boltasækjara.

„Tilgangslaust þetta boltasækjara-dæmi í Bestu. Krökkunum sagt að haga sér á þann hátt að mótherji heimaliðs tapi á að hafa þá og fá í staðinn hótanir um barsmíðar og orðbragð sem ekki er hafandi eftir, þetta eru 9-12 ára gömul börn! …breytingar takk,“ segir Stebba Sigurðardóttir á Twitter-síðu sinni.

Það er spurning hvort brugðist verði við athæfi sem þessu en Orri Sigurður Ómarsson, leikmaður Vals, svaraði Stebbu og stakk einfaldlega upp á því að sama leið yrði farin og þegar kórónufaraldurinn lét sem hæst. Þá var boltunum einfaldlega komið fyrir á keilum meðfram vellinum og gæslumenn leiksins sáu um að skila boltum þangað sem fóru út af.

Eftir leik gærkvöldsins er Breiðablik er á toppi Bestu deildarinnar með 39 stig eftir 17 leiki. Þar á eftir kemur KA með 33 og svo Víkingur með 31 en Íslandsmeistararnir eiga leik til góða.

Fréttin hefur verið uppfærð.