Innlent

Slitlagið á Dynjandisheiði lengist og bætt í við Flókalund

Kristján Már Unnarsson skrifar
Klæðningarflokkur Borgarverks í veðurblíðu á Dynjandisheiði í dag. Í baksýn sér niður í Arnarfjörð.
Klæðningarflokkur Borgarverks í veðurblíðu á Dynjandisheiði í dag. Í baksýn sér niður í Arnarfjörð. Borgarverk/Bjarki Hlífar Stefánsson

Klæðningarflokkur Borgarverks, sem undirverktaki ÍAV, lauk núna undir kvöld við að leggja síðari umferð bundins slitlags á fjögurra kílómetra kafla Vestfjarðavegar um Dynjandisheiði. Þar með hafa tólf kílómetrar malbiks bæst við á einu ári á þjóðveginn milli Flókalundar og Mjólkárvirkjunar en tvö ár eru frá því Íslenskir aðalverktakar hófu þennan fyrsta áfanga endurbóta vegarins um Dynjandisheiði.

Kaflinn sem núna var klæddur liggur um Helluskarð, milli Þverdals og Norðdalsár, en einnig var slitlag lagt á nýjan 600 metra kafla Bíldudalsvegar frá gatnamótum í skarðinu. Fyrri umferð slitlagsins var lögð á síðastliðinn mánudag, að sögn Bjarka Hlífars Stefánssonar, verkstjóra hjá Borgarverki.

Nýi kaflinn liggur um Helluskarð. Fjöllin Isufell og Breiðafell hafa saman verið nefnd Hornatær, ásamt Klakki og Ármannsfelli, sem eru fjær.Borgarverk/Bjarki Hlífar Stefánsson

Áður var búið að leggja bundið slitlag á rúma fjóra kílómetra milli Dynjanda og Mjólkár sem og á fjögurra kílómetra kafla úr Vatnsfirði um svokallaðan Pennusneiðing og upp fyrir Þverdalsá.

Þá hefur Vegagerðin samið við ÍAV um að lagfæra malarkaflann milli Flókalundar og Pennusneiðings, sem er um eins kílómetra langur. Ekki verður þó farið í endurbyggingu heldur verður kaflinn breikkaður í haust í sama vegstæði og blindhæðir teknar af, að sögn Sigurþórs Guðmundssonar, verkefnisstjóra Vegagerðarinnar. 

Eins kílómetra malarkafli ofan Flókalundar verður lagður bráðabirgðaslitlagi þar til niðurstaða fæst um framtíðarvegstæði um friðland Vatnsfjarðar.Stöð 2

Slitlag bætist svo við næsta sumar en ótækt þótti að skilja þennan kafla eftir ómalbikaðan meðan tekist er á um nýtt framtíðarvegstæði um friðland Vatnsfjarðar.

Brúin yfir Pennu, þar sem styttan stendur af Pennukarlinum, verður áfram einbreið. Sigurþór segir að öryggi verði þó bætt við brúna með vegriði á veginn beggja vegna að henni.

Vinnuflokkur ÍAV að störfum á heiðinni í dag við Norðdalsá. Hann lagfærir síðan kaflann næst Flókalundi,Borgarverk/Bjarki Hlífar Stefánsson

Sigurþór vonast jafnframt til að Suðurverk hefji sem allra fyrst vinnu við næsta áfanga á Dynjandisheiði, 12,6 kílómetra kafla frá Norðdalsá, norðan Bíldudalsgatnamóta, um hæstu hluta heiðarinnar og norður fyrir sýslumörk. Suðurverk átti lægsta boð í verkið upp á 2.455 milljónir króna. Framkvæmdatími er áætlaður tæp tvö ár og gert ráð fyrir verklokum 15. júlí 2024.

Hér má sjá frétt Stöðvar 2 frá upphafi framkvæmda fyrir tveimur árum:

Vegagerð Samgöngur Umferðaröryggi Vesturbyggð Ísafjarðarbær Dýrafjarðargöng

Tengdar fréttir

Suðurverk átti lægsta boð í næsta áfanga vegarins yfir Dynjandisheiði

Suðurverk hf. í Kópavogi átti lægsta tilboð í nýbyggingu Vestfjarðavegar á 12,6 kílómetra kafla á Dynjandisheiði. Tilboð Suðurverks hljóðar upp á 2.455 milljónir króna sem var 1,8 prósent, eða 42 milljónum króna, yfir áætluðum verktakakostnaði upp á 2.412 milljónir króna.

Klæðning lögð um Pennudal áleiðis upp á Dynjandisheiði

Klæðningarflokkur frá Borgarverki, undirverktaka ÍAV, hóf í morgun að leggja fyrri umferð bundins slitlags á kafla Vestfjarðavegar um Pennudal, eða Penningsdal, ofan Flókalundar í Vatnsfirði. Þetta er vegarkafli sem opnaður var umferð í nóvember en ekki náðist þá að klæða hann fyrir veturinn vegna óhagstæðs veðurs.

Keppast við vegabætur áður en holskefla ferðamanna ríður yfir

Vestfirðingar gleðjast yfir því í dag að ferðabókaútgefandinn Lonely Planet hafi sett fjórðunginn í efsta sæti yfir þau svæði heims sem best sé að heimsækja á næsta ári. Ferðamanna bíða hins vegar holóttir malarvegir og einbreiðar brýr fyrir vestan og það stefnir í bið eftir næsta áfanga á Dynjandisheiði.

Þurfa að vinna rösklega í vetur á Dynjandisheiði

Framkvæmdir eru komnar á fullt við fyrsta áfanga nýs þjóðvegar yfir Dynjandisheiði. Fyrstu tíu kílómetrarnir eiga að vera tilbúnir með malbiki innan ellefu mánaða. Myndir frá sprengingum á verkstað mátti sjá í fréttum Stöðvar 2.

Samgöngufélagið hvetur til þverunar Vatnsfjarðar

Átök gætu verið í uppsiglingu um þverun Vatnsfjarðar í Barðastrandarsýslu. Könnun sem áhugafélag um samgöngur lét gera sýnir verulegan stuðning við þverun. Undirstofnanir umhverfisráðuneytis, sem og sveitarfélagið Vesturbyggð, leggjast hins vegar gegn hugmyndinni.

Mest lesið


Fleiri fréttir

Sjá meira


×

Mest lesið