Rangers fékk skell í endurkomunni | Öruggur sigur hjá Sporting í Frankfurt

Ajax vann 4-0 sigur á heimavelli gegn Rangers í fyrsta leik A-riðils Meistaradeildar Evrópu í kvöld. Rangers var að spila sinn fyrsta leik í riðlakeppni Meistaradeildarinnar síðan 2010. 

Sigur Ajax var aldrei í hættu en heimamenn voru 3-0 yfir í hálfleik eftir mörk Edson Alvarez, Steven Berghuis og Mohammed Kudus. Steven Bergwijn skoraði svo lokamark leiksins á 80. mínútu.

Ajax og Rangers eru með Liverpool og Napoli í A-riðli en síðarnefndu tvö liðin mætast síðar í kvöld.

Í Þýskalandi tóku Evrópudeildarmeistarar Eintracht Frankfurt á móti Sporting frá Lisbon. Gestirnir unnu þar sannfærandi 0-3 sigur með mörkum frá Trincao, Nuno Santos og Marcus Edwards. Sporting fer því á topp riðilsins en Tottenham og Marseille eigast við í hinum leik riðilsins klukkan 19.00 í kvöld.