Fundu fíkni­efna­ræktun í Kópa­vogi

Nóg virðist hafa verið að gera hjá umferðardeild lögreglunnar en einn var stöðvaður á sjöunda tímanum í Laugardal í gær grunaður um ölvun við akstur.Þá var hann ekki með ökuskírteini sitt meðferðis við aksturinn. Annar var stöðvaður í Múlunum í gærkvöldi grunaður um akstur undir áhrifum fíkniefna og ítrekaðan akstur án gildra ökuréttinda. Einn til viðbótar var stöðvaður á þriðja tímanum í nótt grunaður um akstur undir áhrifum fíkniefna. 

Fjórir ökumenn voru stöðvaðir á milli klukkan níu og tíu í gærkvöldi eftir hraðamælingu. Voru þeir mældir á 109, 117, 120 og 121 kílómetra hraða á Kringlumýrarbraut, þar sem hámarkshraði er 80. Ökumennirnir viðurkenndu allir brot sitt og gáfu skýrslu á vettvangi. Einn til viðbótar var stöðvaður fyrir hraðakstur á Kringlumýrarbraut, laust fyrir klukkan eitt í nótt. Sá var sautján ára og viðurkenndi brot sitt en forráðamanni hans var tilkynnt málið. 

Tilkynnt var um umferðaróhapp í Múlunum í gær. Þar hafði ökumaður ekið útaf og upp á umferðareyju. Maðurinn fann til eymsla í höfði og hálsi og var fluttur með sjúkrabíl til aðhlynningar. Þá var tilkynnt um umferðarslys í Árbæ. Bíl hafði verið ekið á ljósastaur en ökumaður hafði yfirgefið vettvang. Þá var tilkynnt um bílveltu við Þingvallaveg. Ökumaðurinn var einn á ferð og hafði tekist að koma sér sjálfur út úr bílnum en var fluttur með sjúkrabíl á bráðamóttöku. Ökumaðurinn er grunaður um akstur undir áhrifum áfengis og fleiri umferðarlagabrot.

 Tilkynnt var um innbrot í sumarbústað í Hafnarfirði en sjónvarpi, ryksuguróbot og fleiri verðmætum hafði verið stolið. Þá var tilkynnt um þjófnað úr verslun en maður með svarta andlitsgrímu hafði farið inn og stolið peningum úr sjóðsvél. Málið er til rannsóknar.