Þetta er ekki í fyrsta sinn sem Carlsen kemur til landsins en sviðsljósið á skákheiminn hefur sjaldan ef nokkurn tímann verið meira. Ástæðan er ásakanir Carlsen á hendur Bandaríkjamanninum Hans Niemann um svindl. Niemann hefur stefnt Carlsen og fleirum í skákheiminum og krefst milljarða í skaðabætur.
Niemann er reyndar ekki einn þeirra sem keppir á mótinu í Reykjavík í næstu viku. Þar er þó enga aukvisa að finna. Wesley So, ríkjandi heimsmeistari í Fischer-skák, er líklegur til afreks. Sömuleiðis Ian Nepomniachtchi sem beið lægri hlut í síðasta heimsmeistaraeinvígi við Carlsen.
Hikaru Nakamura, sem kalla mætti streymiskóng skákheimsins, mætir til Íslands. Sá mokar inn peningum með streymi á YouTube og Twitch. Hann er þekktur fyrir að vera hrokafullur en á skemmtilegan hátt.
Þá er úsbeska undrabarnið, hinn sautján ára Nodirbek Abdusattorov, á meðal keppenda. Ungstirnið er heimsmeistari í atskák og leiddi Úsbeka til sigurs á Ólympíuskákmótinu.
Hjörvar Steinn Grétarsson, tvöfaldur Íslandsmeistari og stigahæsti skákmaður landsins, er fulltrúi gestgjafans. Íslands.
Heildarverðlaunafé er upp 400 þúsund dollara en sigurvegari nælir sér í 150 þúsund dollara; rúmlega 21 milljón króna. Sá sem lendir í síðasta sæti fær rúma milljón. Aðrir einhvers staðar þar á milli eftir árangri.
Aðspurður hvernig hafi tekist að fjármagna verðlaunafé á borð við þetta nefnir Gunnar rausnarlega styrki frá ríki og Reykjavíkurborg. Auk þess norskur rétthafi heimsmeistaramótsins.
Reynir aðeins á heilann
Gunnar Björnsson er forseti Skáksambands Íslands. Hann var staddur við undirbúning keppninnar á Hótel Natura, áður Hótel Loftleiðum, þegar blaðamaður náði af honum tali. Von er á keppendum til landsins á sunnudagskvöld, flestum í það minnsta, og svo verður dregið í riðla á opnunarhátíð á mánudagskvöld.
Gunnar segir fyrirkomulagið að einhverju leyti eins og þekkist í boltaíþróttum. Tveir fjögurra manna riðlar. Tveir komast upp úr hverjum riðli. Svo er teflt í kross, þ.e. efsti maður í öðrum riðlinum mætir öðru sætinu í hinum, og að lokum er keppt til úrslita.
En hvað er Fischer-skák? Hún er eðli máls samkvæmt skyld venjulegri skák. Helsti munurinn er sá að keppendur vita ekki hvernig taflmennirnir átta fyrir aftan peðin raðast í upphafi skákar.
„Korteri fyrir skák fá þeir að sjá stöðuna og mega fara afsíðis með þjálfara sínum. Þeir mega skoða stöðuna í tíu til tólf mínútur án tölvu og síma,“ útskýrir Gunnar.
„Þetta reynir aðeins á heilann,“ bætir hann við.
Blaðamaður efast ekki um það eitt augnablik. En veltir fyrir sér hvort þessi keppni sé á léttari nótum en önnur skákmót. Hér sé verið að heiðra Bobby Fischer, reglurnar öðruvísi og keppendur séu mættir til að skemmta sér.
„Verðlaunin eru 400 þúsund dollarar svo ég myndi ekki segja að þetta væri á léttu nótunum,“ útskýrir Gunnar fyrir blaðamanni.
Heimsækja Fischer-setrið
Gunnar útskýrir fyrir blaðamanni að Magnus Carlsen eigi alls ekkert sigurinn vísann þrátt fyrir að vera heimsmeistari og óumdeilanlega sterkari skákmaður heimsins. Í fyrsta og eina heimsmeistaramótinu í Fischer-skák til þessa hafi Wesley So unnið öruggan sigur á Carlsen.
Svo séu keppendur misvanir að tefla þetta afbrigði skákar. Vafalítið hafi menn verið við stífar æfingar í Fischer-afbrigðinu. Þykist hann vita að Hjörvar Steinn hafi notað undanfarna daga og vikur til að æfa sig gegn tölvum. Þannig öðlist reynsla við að fá hugmyndir hvernig skuli tefla í þeim ólíku stöðum sem upp geti komið.
Hvert einvígi samanstendur af tveimur klukkustundarlöngum skákum. Keppendur mæta tveimur andstæðingum á hverjum degi. Því er um að ræða fjögurra klukkustunda langa törn á Hótel Natura. Vettvangurinn tengist Bobby Fischer sem gisti á hótelinu í Einvígi aldarinnar 1972, fyrir fimmtíu árum. Jú, það er verið að halda upp á afmæli einvígisins.
Reiknað er með að keppendur noti frídag á föstudaginn til að heimsækja gröf Fischer og setur í hans nafni á Selfossi. Gunnar segir ekki von á mörgum blaðamönnum að utan vegna mótsins. Þó sé von á hópi frá Ríkisútvarpi Norðmanna, NRK, sem fylgja Carlsen eftir hvert fótmál.
Keppt verður til úrslita aðra helgi. Undanúrslit á laugardegi og úrslit á sunnudegi. Sýnt verður frá mótinu á RÚV þar sem Ingvar Þór Jóhannesson og Björn Þorfinnsson verða í aðalhlutverkum.
