Líkamsárás, eignaspjöll og menn undir áhrifum

Í miðborginni var einum ofurölvi einstakling ekið heim og öðrum í sama ástandi komið í úrræði, samkvæmt tilkynningu lögreglu. Þá var tilkynnt um líkamsárás og eignarspjöll og er það mál í rannsókn.

Einn var handtekinn í miðborginni vegna þjófnaðar og vímuástands, eftir annað útkall næturinnar vegna mannsins. Einum ölvuðum einstakling var vísað úr bílakjallara vegna hátternis og þá var tilkynnt um innbrot á heimili. 

Að auki voru no0kkrir stöðvaðir vegna gruns um akstur undir áhrifum.

Í öðrum hverfum borgarinnar var óskað eftir aðstoð lögreglu vegna neyslu fíkniefna í fjölbýlishúsi en ekki þótti ástæða til aðgerða þegar lögregla kom á vettvang. Þá var manni vísað útaf hóteli vegna vímuástands.

Lögregla sinnti einnig útkalli vegna hávaðakvörtunar og eignaspjalla á bifreið og aðstoðaði sjúkralið í útkalli.