Tíu heppin fá að skemmta sér á skútu með Söru Sigmunds í Miami

Sara fékk boð á mótið og ætlar þar eflaust að reyna að eyða minningunni frá því í Miami í fyrra þegar hún varð að hætta á miðju móti vegna meiðsla.

Það eru líka margir spenntir að sjá hvað Sara ætlar að gera á árinu 2023 eftir að hafa misst af 2021 tímabilinu vegna meiðsla og ekki verið fullfrísk á árinu 2022 eftir að hún var enn að ná fullum styrk á ný eftir krossbandsslit.

Nú hefur Sara fengið góðan tíma til að komast yfir meiðslin og áður en kemur að opna hlutanum í baráttunni um sæti á heimsleikunum þá ætlar Sara að keppa á þessu sterka móti i Flórída.

Sara er vinsæll keppandi á CrossFit mótunum eins og hefur sýnt sig þegar hún hefur boðið aðdáendum upp á að hitta sig. Nú geta aðdáendur hennar hitt hana á sérstökum stað.

Sara ætlar nefnilega að bjóða tíu heppnum aðdáendum sínum að eyða með sér tíma á seglskútu í höfninni við Miami borg. Miðvikudaginn 11. janúar mun hún taka á móti þeim heppnu sem allir mega taka með sér einn gest.

„Hver vill hitta mig og starfsfólk Spacer mobility á skútu í Miami. Ég hef aldrei verið á skútu áður þannig að ég mjög spennt,“ skrifaði Sara á samfélagsmiðla sína.

Til þess að koma til greina þá þurfa áhugasamir að koma með athugasemd við Instagram færslu Söru, hér fyrir neðan, og merkja vininn sem þú vilt taka með.

Sara ætlar að draga út tíu vinningshafa 21. desember næstkomandi en fyrir áhugasama á Íslandi þá er þetta aðeins boð um að vera á skútunni en þeir hinir sömu þurfa að koma sér sjálfir til Flórída.

Sara segist hlakka mikið til og þeir sem þekkja til hennar ættu að vita að þetta gæti orðið mjög skemmtilegur dagur á skútunni.

Mótið sjálft hefst síðan daginn eftir, 12.janúar og stendur til 15. janúar.