Leik­manna­hópur Freys hjá Lyng­by minnkar

Það er ávallt langt jólafrí í dönsku úrvalsdeildinni en að þessu sinni er fríið örlítið lengra en vanalega vegna heimsmeistaramótsins sem fram fór í Katar. Liðið mætir toppliði Nordsjælland þann 19. febrúar þegar deildin fer af stað á nýjan leik.

Freyr Alexandersson, þjálfari liðsins, á erfitt verkefni fyrir höndum en Lyngby kemur inn í seinni hluta tímabilsins með aðeins 8 stig að loknum 17 umferðum. Það gefur liðinu þó örlitla von að hafa loks unnið leik í síðustu umferð fyrir frí.

Á sama tíma og það mætti ætla að Freyr væri að sækja leikmenn til að styrkja liðið þá hefur Lyngby tilkynnt að tveir leikmenn séu horfnir á braut. Norska félagið Bodö/Glimt hefur fest kaup á bakverðinum Adam Sörensen og þá er Emil Nielsen að ganga til liðs við Orange County sem leikur í USL deildinni í Bandaríkjunum.

Ásamt þjálfaranum Frey þá eru sóknarmennirnir Alfreð Finnbogason og Sævar Atli Magnússon á mála hjá Lyngby. Sá fyrrnefndi ætti að vera búinn að ná sér af meiðslum þegar liðið tekur á móti Nordsjælland.