Framlengingin: Kristófer Acox er besti leikmaður deildarinnar

áður en þeir félagar veltu fyrir sér hver væri besti leikmaður deildarinnar varpaði Kjartan Atli Kjartansson, stjórnandi þáttarins, fram þeirri spurningu hvaða lið yrði bikarmeistari. Stjarnan, Keflavík, Valur og Höttur eru komin í undanúrslit, en sérfræðingar þáttarins voru ekki sammála um þap hvaða lið myndi fagna titilinum.

Hermann Hauksson var alveg viss um það að Valsmenn eigi eftir að taka bikarinn með sér heim, en Örvar Þór Kristjánsson sagði að tími Keflavíkur væri kominn.

Næst spurði Kjartan þá félaga að því hver besti leikmaður Subway-deildarinnar væri. Það stóð ekki á svörum hjá sérfræðingunum og voru þeir báðir sammála um það að Kristófer Acox, leikmaður Vals, væri sá besti.

„Mér finnst Kristófer Acox besti leikmaður deildarinnar,“ sagði Örvar. 

„Hann gerir svo margt og er með svo mikið forðabúr. Ef ég væri að stofna „franchise“ og mætti velja mér leikmann þá myndi ég taka hann. Hann er svona MVP í mínum huga.“

Hermann tók í sama streng, en nefndi þó einnig liðsfélaga Kristófers hjá Val, Kára Jónsson.

„Ég ætlaði líka að segja Kristófer Acox en fyrst þú segir það þá ætla ég líka að nefna Kára Jóns hjá Val. Valur er í dag með tvo bestu leikmennina,“ sagði Hermann.

„Kári er bara að sýna í ár hvað hann er orðinn reynslumikill leikmaður. Hann stýrir liðinu vel, skorar mikilvægar körfur og heldur jafnvægi Valsara hrikalega vel inni á velli líka. Þannig mér finnst hann vera frábær líka.“

Þá veltu strákarnir einnig fyrir sér hvað það væri sem kæmi upp í hugann þegar talað væri um Ljónagryfjuna, hver besti þjálfari fyrri hlutans væri og hvort það væri eðlilegt að leikmenn væru að skella sér til Tenerife á miðju tímabili, en Framlenginguna má sjá í heild sinni hér fyrir ofan.