Lyon svarar Söru og segist hafa gert allt sem það gat til að styðja við bakið á henni

Í grein Söru segir hún meðal annars frá því að hún hafi ekki fengið greidd full laun á meðan hún var ólétt og að henni hafi verið tjáð að hún ætti enga framtíð hjá félaginu ef hún myndi fara með málið til Alþjóðaknattspyrnusambandsins, FIFA.

Grein Söru hefur vakið mikla athygli, bæði hér heima og utan landsteinanna. Margir hafa þakkað Söru fyrir sína baráttu, en eins og kemur fram í greininni sem Sara skrifaði vann hún málið og Lyon var því gert að greiða henni þau laun sem félagið skuldaði henni.

Lyon sendi svo frá sér fréttatilkynningu eftir að grein Söru birtist þar sem félagið svarar gagnrýni landsliðsfyrirliðans fyrrverandi. Félagið segist hafa gert allt sem í sínu valdi stóð til að styðja við bakið á Söru í gegnum óléttuna, en að frönsk lög hafi komið í veg fyrir ýmislegt.

„Olymp­ique Lyonna­is hef­ur alltaf verið í far­ar­broddi í kvennaknattspyrnu og hef­ur stutt sína liðsmenn á öll­um sviðum lífs­ins,“ segir í upphafi fréttatilkynningarinnar.

„Við höfum alltaf virt frönsk lög, sem okkur hefur stundum fundist of ströng í þessum málum. Þess vegna höfum við alltaf barist fyrir aukinni vernd leikmanna í þessum málum.“

„Við höfum gert allt sem við getum gert til að styðja Söru Björk Gunnarsdóttur í móðurhlutverkinu, og í endurkomu hennar á hæsta getustig.“

Stolt af því að hafa aðstoðað Söru að snúa aftur á völlinn

Fljótlega eftir að Sara komst að því að hún væri barnshafandi fékk hún leyfi frá félaginu til að fara heim til Íslands og klára meðgönguna í nálægð við sína nánustu fjölskyldu. Í fréttatilkynningu Lyon segir að félagið hafi gert allt sem í sínu valdi stóð til að aðstoða Söru eftir að hún snéri aftur til Frakklands, en í grein sinni bendir Sara þó á að enginn frá félaginu hafi haft samband við hana á meðan hún dvaldi á Íslandi. Hvorki til að athuga andlega, né líkamlega líðan hennar.

„Við urðum við ósk hennar og samþykktum að leyfa henni að taka fæðingarorlofið á Íslandi, heimalandi hennar. Þegar hún snéri aftur til Frakklands, eftir að sonur hennar fæddist, gerðum við allt sem við gátum til að aðstoða hana að komast aftur í sem best líkamlegt form við aðstæður til að lifa sem bestu lífi í sínu nýja hlutverki sem móðir, ásamt því að tryggja það að hún gæti hafi keppni á ný, með aukinni aðstoð, líkt og við gerðum síðar með Amel Majri,“ segir í fréttatilkynningunni.

„Þetta málefni stendur okkur nærri og við erum stolt af því að hafa staðið með henni þessa mánuði á meðan hún var ólétt og þar til hún snéri aftur á völlinn gegn Suyaux, þar sem hún fékk að ferðast með barni sínu og barnfóstru.“

Gleðjast yfir nýrri reglugerð FIFA en segja hana stangast á við frönsk lög

Þá bendir Lyon á að FIFA hafi nýlega kynnt nýja reglugerð sem séu til þess komin að aðstoða leikmenn sem þurfa á fæðingarorlofi að halda og að félagið fagni því. Í sömu andrá segir félagið að þessi reglugerð FIFA stangist á við frönsk lög og að því hafi Söru ekki verið boðinn nýr samningur.

„Nýlega lagði FIFA í fyrsta skipti fram reglugerð varðandi leikmenn sem þurfa á fæðingarorlofi að halda á meðan ferlinum stendur. Við gleðjumst yfir því.“

„En nú gagnrýnir FIFA okkur fyrir að hafa ekki boðið Söru Björk Gunnarsdóttur nýjan samning á meðan hún var í veikindaleyfi og síðar fæðingarleyfi, en á sama tíma heimila frönsk lög okkur það ekki, og leikmaðurinn lagði áherslu á það að fá að dvelja heima á Íslandi sem við samþykktum. Við erum stolt af því að hafa haft Söru Björk Gunnarsdóttur í leikmannahópi Olympique Lyonnais. Leiðir okkar skildu aðeins af íþróttalegum ástæðum.

Bjóða Söru að aðstoða sig við að breyta lögunum

Í lok fréttatilkynningarinnar endar félagið svo á því að bjóða Söru að aðstoða sig í að breyta þessum frönsku lögum sem félagið segir að hafi staðið í vegi fyrir sér. Félagið sé tilbúið að berjast fyrir réttindum leikmanna þegar kemur að fæðingarorlofi með henni og núverandi leikmanni liðsins, Amel Majri, sem eignaðist barn fyrir um hálfu ári.

„Ef hún óskar þess að aðstoða okkur að þróa frönsku lögin, þá viljum við gjarnan hafa hana með í baráttu okkar, ásamt Amel Majri, um að allt íþróttafólk fái að njóta fæðingarorlofsins til fullnustu og snúa aftur til keppni að því loknu,“ segir að lokum í tilkynningunni.

Gefur lítið fyrir orð Lyon

Árni Vilhjálmsson, barnsfaðir Söru, deildi fréttatilkynningu Lyon á samfélagsmiðlinum Twitter stuttu eftir að hún kom út. Í svari við tístinu telur hann upp nokkur atriði sem honum þykir félagið hafa gert illa á meðan Sara var barnshafandi og biður fólk um að opna augun.

Árni segir enn fremur að listinn sé alls ekki tæmandi og að hann gæti haldið lengi áfram. Félagið hafi tapað málinu og nú sé kominn tími til að axla ábyrgð.