Fimmtíu bestu: Herra Haukar og skarðið sem hefur ekki verið fyllt

10. Tjörvi Þorgeirsson

Tjörvi Þorgeirsson er með meirapróf í að stýra handboltaliðum. Raunar bara einu handboltaliði, Haukum, sem hann hefur leikið með allan sinn feril. Og það er kannski viðeigandi þar sem faðir hans, Þorgeir Haraldsson, hefur verið formaður handknattleiksdeildar Hauka svo lengi sem elstu menn muna.

Tjörvi hefur alltaf fyrst og síðast spilað fyrir liðið og samherja sína og eigin tölfræði og frami hefur mætt afgangi, eins og góðra leikstjórnanda er siður.

Tjörvi mætir venjulega snyrtilegur til fara í vinnuna en á tyllidögum fer hann í sparifötin. Þá koma undirskotin glæsilegu, sérstaklega smekklegu línusendingarnar og taktar sem hann á til í geymslunni. Oftast nær er þetta í stórum sjónvarpsleikjum og alltaf þegar Gummi Ben er að lýsa, einhverra hluta vegna.

Líklega hefur enginn leikmaður orðið deildarmeistari jafn oft og Tjörvi, eða átta sinnum. En þótt hann hafi fjórum sinnum orðið Íslandsmeistari, tvisvar sinnum sem lykilmaður, hefur herslumuninn oft vantað. Til marks um það á Tjörvi fjórar silfurmedalíur í safninu sínu.

Leikstjórnandi af guðs náð. Afburða skotmaður og með leiksskilning upp á tíu. Borið lið Hauka uppi á síðustu árum en því miður fyrir hann voru aðrir honum fremri þegar íslenska landsliðið var valið er hann var uppi á sitt besta. Hefði verðskuldað meiri athygli.

En titlarnir eru fimmtán talsins, geri aðrir betur, og arfleiðin er tryggð. Þegar Tjörvi leggur skóna á hilluna fer hann alltaf í sögubækurnar sem einn besti leikmaður í sögu Hauka og einn besti leikmaður efstu deildar frá upphafi.

9. Janus Daði Smárason

Janus Daði Smárason spilaði bara tvö og hálft tímabil hér á landi en þessi tvö og hálfu tímabil var hann langbesti leikmaður deildarinnar. Gæðin voru meiri en magnið.

Janus bjó um tíma í Danmörku og maður hafði aðeins heyrt útundan sér um hæfileika hans en aldrei séð hann spila áður en hann kom í Olís-deildina 2014. En þá staðfesti hann að goðsagan um hann var byggð á traustum grunni. Fyrsti leikur hans hér heima var gegn Val og hann var svo eftirminnilegur að undirritaður man enn hvar hann var þegar hann horfði á þann leik.

Haukar voru ekkert sérstakir í deildakeppninni 2014-15 og enduðu í 6. sæti. En það var eins og þeir hefðu drukkið jötunseyði fyrir úrslitakeppnina því þar átti enginn möguleika í þá. Þrátt fyrir að vera ekki með heimavallarrétt í neinu einvígi unnu Hafnfirðingar alla átta leiki sína og stóðu uppi sem Íslandsmeistarar.

Janus var besti leikmaður Hauka tímabilið 2014-15 og sú var einnig raunin tímabilið 2015-16. Þar urðu Haukar deildarmeistarar en lentu í kröppum dansi í úrslitaeinvíginu gegn Aftureldingu. Mosfellingar komust í 2-1 eftir sigur í mögnuðum spennutrylli á Ásvöllum en Hafnfirðingar tryggðu sér oddaleik með sigri í framlengdum fjórða leik liðanna í Mosfellsbænum.

Haukar unnu svo oddaleikinn og urðu Íslandsmeistarar annað árið í röð. Engum blöðum var um það að fletta hver besti leikmaður þeirra var. Janus var sólin sem allt í sóknarleik Hauka snerist í kringum. Ótrúlega hugaður og leikmaður sem réðist alltaf á vörnina eins og villimaður, sama hversu fast hann var laminn í sókninni á undan.

Setti mark sitt á deildina þegar hann lék með Haukum. Var langbesti leikmaður deildarinnar og hefur gert afar vel á sínum ferli. Líklega draumaleikmaður allra þjálfara sem hafa verið með hann í liði enda leikmaður sem þarf ekki að segja hvað eigi að spila. Leikstjórnandi í hæsta gæðaflokki.

Gaupi

Enginn veit hvað átt hefur fyrr en misst hefur og þegar Janus fór sást það best hversu mikilvægur hann var Haukum. Þeir hafa ekki orðið Íslandsmeistarar síðan hann fór og það er ekki tilviljun. Í sjö ár hafa Haukar verið að reyna að finna leiðir til að fylla skarðið sem hann skildi eftir sig en án árangurs.