Tólf þúsund manns sagt upp hjá Alphabet

Pichai sagði í tölvupósti sem hann sendi á starfsmenn og var birtur á vef Alphabet að undanfarin tvö ár hefði mikill vöxtur orðið á rekstri fyrirtækisins og margir hefðu verið ráðnir til starfa til að annast þann vöxt. Nú væru efnahagsástæður samt töluvert öðruvísi.

Önnur stór tæknifyrirtæki eins og Microsoft, Amazon, Meta og fleiri hafa sagt upp tugum þúsunda manna að undanförnu. Samkvæmt AP fréttaveitunni hafa stærstu tæknifyrirtækin sagt upp minnst 48 þúsund manns í þessum mánuði.

Í lok síðasta árs sögðu forsvarsmenn Alphabet að nærri því 187 þúsund manns störfuðu hjá fyrirtækinu. Miðað við það er verið að segja upp rúmlega sex prósentum af starfsmönnum fyrirtækisins.

Í áðurnefndum tölvupósti Pichai sagðist hann sá stórt tækifæri í þróun gervigreindar en þar væri nauðsynlegt að taka erfiðar ákvarðanir. Búið væri að framkvæma endurskoðun með því markmiði að ganga úr skugga um að starfsmannamál félaganna væru í takt við áherslur þeirra. Uppsagnirnar tækju hliðsjón af þessari endurskoðun.

Pichai sagði einnig að óhjákvæmilegt væri að tæplega aldarfjórðungsgamalt fyrirtæki gengi í gegnum erfiðar tíma. Þá tíma yrði að nota til að skerpa línurnar og endurskipuleggja starfsemi.

Hann vísaði aftur til þróunar gervigreindar og sagði að ákvörðun sem tekin var fyrir nokkrum árum um að leggja meiri áherslu á þessa vinnu hefði skilað miklum árangri fyrir Google. Vörur fyrirtækisins hefðu aldrei verið betri og verið væri að leggja grunn að nýrri upplifun viðskiptavina.