Brotnaði gjör­sam­lega eftir netníð og per­sónu­á­rásir

Frosti fór í leyfi frá störfum sínum hjá Sýn í mars á síðasta ári þar sem hann hafði starfað sem dagskrárgerðarmaður og sjónvarpsmaður á Stöð 2. Ástæðan var viðtal í þættinum Eiginkonur á Stundinni. Þar sagðist Edda Pétursdóttir, fyrrverandi kærasta Frosta, hafa lifað í stöðugum ótta um að fyrrverandi kærasti hennar myndi láta verða af hótunum um að dreifa kynferðislegum myndböndum af henni. Myndböndin hafi hann tekið upp án hennar vitundar á meðan þau voru enn saman.

Frosti óskaði eftir því að fara í leyfi þegar málið kom upp og birti yfirlýsingu þar sem hann sagðist taka fulla ábyrgð á sinni hegðun. Hann kvaðst hafa verið haldinn þráhyggju í kjölfar sambandsslita þeirra og sagðist sjá mikið eftir hegðun sinni. 

Á dögunum sneri hann aftur á sjónarsviðið og stofnaði efnisveituna Brotkast, ásamt Helgu Gabríelu. Í fyrsta þætti segir Frosti meðal annars að að feðraveldið sé „uppdiktuð bullukollukenning“ og uppskar mikla gagnrýni á Twitter fyrir vikið. 

Í tísti stakk Guðrún Ósk Þórudóttir, sem einnig er hlaðvarpsstjórnandi, upp á því í hæðnistón að Frosti og fjölmiðlamaðurinn Sölvi Tryggvason skrifi bók saman um hve mikil fórnarlömb þeir séu. Sölvi steig úr sviðljósinu í rúmt ár eftir að hafa verið til­kynntur til lög­reglu vegna meints of­beldis. 

Helga Gabríela svaraði því tísti og stingur upp á að Guðrún „skelli sér á hlaupabrettið“ og „hætti að vera svona ógeðslegur netníðingur“.  Því tísti var svarað af Tönju Ísfjörð, meðlimi félagasamtakanna Öfga, sem sakar Helgu um líkamssmánun. 

Tilneydd til að svara

Helga Gabríela hefur nú eytt sínum tístum og segist sjá mikið eftir því að hafa svarað í sömu mynt, eins og hún orðar það á Facebook. Í sömu færslu segist hún hafa kynnst Frosta árið 2014 þegar hann hafi enn verið að jafna sig af því andlega ofbeldi sem hann hefði orðið fyrir í fyrra sambandi „og ég veit nógu mikið um það mál til að vita hversu ósanngjörn umfjöllunin um það hefur verið.“ Frosti gekkst við ásökunum fyrrverandi kærustu sinnar í mars á síðasta ári en segir þær nú að hluta til sannar í nýrri færslu á Facebook. 

Helga Gabríela segir líf þeirra Frosta hafa farið að blómstra þar til Edda, fyrrverandi kærasta Frosta, tók málið upp að nýju. Helga segir hana hafa málað Frosta upp sem ófreskju. 

„Ég get ekki ætlast til að fólk skilji hvernig það er að vera í þessum aðstæðum, þegar andrúmsloftið í þjóðfélaginu býður ekki upp á að karlmaður verji sig þegar á hann er ráðist og öll fjölskylda hans geldur fyrir það,“ skrifar Helga Gabríela. Hún segist upplifa þær árásir sem árásir á hana sjálfa.

„Allan þennan tíma fram til þessa hef ég aldrei svarað fyrir mig en þegar netníðið og persónuárásirnar náðu hámarki í gær brotnaði ég gjörsamlega og fannst mér ég þá tilneydd að svara fólkinu sem hefur verið að níðast á okkur. Ég svaraði í sömu mynt og ég sé mikið eftir því. Ég var ekki með sjálfri mér. Auðvitað átti ég aldrei að svara og ég mun aldrei gera það aftur,“ segir hún í lok færslu sinnar. 

Hökulaus maðkur og erindislaus lúser

Uppistandarinn Stefán Ingvar Vigfússon tjáði sig einnig um nýstofnaða hlaðvarpsveitu og sagði hana vera „virkilega spennandi fyrir incela“. Incel stendur fyrir involuntary celibate (tilneyddur í skírlífi) og er yfirleitt hvítur, gagnkynhneigður karlmaður sem trúir því að vangeta hans til að eiga í rómantísku eða kynferðislegu sambandi við konur sé konunum að kenna.

Frosti svaraði fyrir sig með því að kalla Stefán „hökulausan maðk“ og sagði að Stefán liti út fyrir að hafa aldrei fengið kjaftshögg en hefði gott af því.  Þess vegna væri hann „wild í tali,“ eins og Frosti orðaði það.

Stefán svaraði því á Twitter:

„Honum [Frosta] finnst umræða um hugmynda- eða fagurfræðilegar fyrirmyndir vlogsins [hlaðvarpsins] ekki svara verð, en fer þess í stað í mínútu rant um að hann hafi sko fengið ríða? Og segir svo að þurfi að kýla mig í andlitið. Erindslaus lúser.“

Skotveiðileyfi gefið út

Jón Trausti Reynisson, framkvæmdastjóri Heimildarinnar, tók upp hanskann fyrir Stefán í grein sem birtist á vef Heimildarinnar. 

Þar gagnrýnir Jón Trausti orðanotkun Frosta og segir það að líkja andstæðingi sínum við ógeðfellt dýr, maðk, sé undanfari þjóðarmorða og vísar til dæma úr sögunni. Engar líkur séu þó á því að Frosti kalli þjóðarmorð yfir uppistandara en ekki sé svo ólíklegt að einhverjir af hans beiskustu fylgismönnum muni á einhverjum tímapunkti álita að „réttasta viðbragðið við ásjónu maðksins sé að kýla hann í andlitið, honum til hagsbóta. Í það minnsta eru hughrifin komin og hann veit núna af möguleikanum,“ skrifar Jón Trausti.

Frosti brást við þessari grein á Facebook þar sem hann segir pistil Jóns kaldhæðnislegan. „Hinn umræddi góði grínisti hafði nefnilega bara skrifað um mig óteljandi færslur á samfélagsmiðlum þar sem hann veittist að persónu minni og mannorði áður en ég leyfði mér að svara honum í fyrsta skipti núna fyrr í þessari viku,“ skrifar Frosti og segir skotveiðileyfi hafa verið gefið út á sig þar sem hann sé andlag „einhliða frásagnar fyrrverandi maka í sérstökum hlaðvarpsþætti sem gerir út á slíkar frásagnir.“ Hann segist ekki ætla að biðjast afsökunar á að hafa staðið upp gegn ofbeldi netníðinga.