„Svo skilst mér að Ásgeir sé á svo svakalegum samningi“

Tvö stig og bæjarstoltið eru undir í kvöld þegar Haukar taka á móti FH í stórleik umferðarinnar í Olís-deildinni.

„Þetta eru frábærir leikir og einir af stóru leikjunum í deildakeppninni fyrir okkur. Það er mikill spenningur og mikið gaman og allir hlakka til,“ sagði Ásgeir þegar blaðamaður hitti þá Sigurstein á 4. hæð Suðurlandsbrautar 8 þar sem þeir starfa saman á fyrirtækjasviði Vodafone.

„Það þarf ekkert að fara sérstaklega yfir það á dagatalinu hvenær þessir leikir eru. Menn vita hvar þeir liggja. Það virðist ekki skipta máli hvar liðin eru í deildinni, þessir leikir leitast oftast í að vera hrikalega spennandi og skemmtilegir. Þetta eru sérstakir leikir.“

Auka fiðringur og spenningur

Ásgeir tekur þátt í sínum fyrsta Hafnarfjarðarslag sem þjálfari í kvöld og hann segir tilhlökkunina mikla.

„Mér líst mjög vel á það. Þetta er svipað eins og sem leikmaður. Það er auka fiðringur og spenningur í manni. Maður kíkir kannski á fimm fleiri klippur en maður er vanur,“ sagði Ásgeir.

FH hefur ekki unnið á Ásvöllum í fimm ár. Sigursteinn segir sína menn stefna á að breyta því í kvöld.

„Við ætlum okkur að sjálfsögðu að vinna en gerum okkur grein fyrir því að það verður mjög erfitt,“ sagði Sigursteinn.

Rígurinn er æðislegur

Þeir segja að leikir Hauka og FH skipti jafn miklu máli nú sem áður og leikirnir séu mjög mikilvægir fyrir bæjarbúa í Hafnarfirði.

„Mér finnst rígurinn vera svipaður. Þetta skiptir alveg máli. Það er fullt af krökkum sem fara annað hvort með kassann út í fyrramálið eða ekki. Og þannig á þetta að vera. Rígurinn er æðislegur fyrir bæði liðin. Ég á marga góða vini sem eru FH-ingar en þetta er samt leikurinn sem mig langar mest að vinna á tímabilinu,“ sagði Ásgeir.

„Þetta skiptir ótrúlega miklu máli. Rígurinn gerir okkur líka góð. Hann er hvetjandi og þetta ýtir mönnum í að gera betur. Hvort sem þetta eru börn eða fullorðnir, þá er þetta eitthvað sem er rætt á kaffistofum á morgun. Ég vil eindregið hvetja alla til að mæta og láta sig hlutina varða. Svo skilst mér að Ásgeir sé á svo svakalegum samningi að það veiti ekki af því að fá eitthvað í kassann,“ sagði Sigursteinn léttur.

Bera saman bækurnar

Sem fyrr sagði vinna þeir Ásgeir og Sigursteinn saman og að þeirra sögn gengur það glimrandi vel.

„Þetta hefur farið mjög vel saman hingað til allavegana. Það er flott. Steini var einn af þeim fyrstu sem óskaði mér til hamingju þegar ég tók við Haukunum. Við berum stundum saman bækur okkar,“ sagði Ásgeir og spurði Sigurstein svo hvort samstarfið væri ekki gott.

„Algjörlega. Það er virðing og vinskapur. Auðvitað er ég FH-ingur og geri allt til að klára dæmið en þess á milli styður maður Ásgeir til góðra verka.“

Fyrsti og síðasti hittingurinn í dag

Þeir félagar hittust í fyrsta sinn í dag þegar viðtalið var tekið um hádegið og því hafði ekki enn reynt á hvort það væri starfhæft á hæðinni.

„Ætli við látum þetta ekki verða það síðasta í dag,“ sagði Sigursteinn. „Ætli við sleppum ekki löngunni í dag,“ sagði Ásgeir og Sigursteinn skaut þá inn í að hann færi beint á salatbarinn í mötuneytinu.

Leikur Hauka og FH hefst klukkan 19:30 og verður sýndur beint á Stöð 2 Sport. Upphitun Seinni bylgjunnar hefst klukkan 19:15.