Martínez ljóstrar upp um það sem hann sagði við Mbappé

Martínez fór mikinn í vítakeppninni og eftir leikinn og nuddaði salti í sár Mbappés. Hann sagði samherjum sínum til að mynda að hafa einnar mínútu þögn fyrir Frakkann og mætti með Mbappé-brúðu þegar Argentínumenn fögnuðu heimsmeistaratitlinum í Búenos Aires. Franska knattspyrnusambandið kvartaði formlega undan hegðun Martínez.

Í nýlegu viðtali sagðist Martínez samt hafa hughreyst Mbappé eftir úrslitaleikinn þar sem Frakkinn skoraði þrennu og svo úr sinni spyrnu í vítakeppninni.

„Ég sagði honum að standa upp og horfa fram á við. Hann ætti ekki að sitja á grasinu heldur vera stoltur af leiknum sem hann spilaði,“ sagði Martínez. „Hann skoraði fjögur mörk gegn mér. Ef einhver ætti að sitja á grasinu er það ég,“ bætti hann við.

Martínez, sem leikur með Aston Villa í ensku úrvalsdeildinni, var valinn besti markvörður HM. Mbappé var markahæsti leikmaður mótsins með átta mörk.