Mischa Barton til liðs við Nágranna

Atli Ísleifsson skrifar 18. apríl 2023 07:57

Mischa Barton er þekktust fyrir hlutverk sitt í þáttunum The OC. EPA

Hollywood- og OC-stjarnan Mischa Barton mun ganga til liðs við leikarahóp áströlsku sápuóperunnar Nágranna sem hefja göngu sína að nýju síðar á árinu.

Barton mun fara með hlutverk hinnar bandarísku Reece sem „sé ekki öll þar sem hún er séð“, líkt og framleiðendur þáttanna komast að orði.

Streymisveita Amazon keypti réttinn að þáttunum á síðasta ári eftir að framleiðslu þáttanna var hætt eftir 37 ára samfellda göngu. Það gerðist eftir að breska sjónvarpsstöðin Channel 5 tilkynnti að ekki væri til nægilegt fjármagn til að halda framleiðslunni áfram.

Tökur hófust að nýju í Melbourne í gær að því er segir í frétt Variety.

Barton segist mjög spennt fyrir því að taka þátt í næsta kafla þessara einstöku þátta. Hún segist mjög spennt að halda til Ástralíu – staðar sem hún þekki vel og elski.

Framleiðandinn Jason Herbison segir að persóna Barton verði óútreiknanleg og að aðdáendur þáttanna komi til með að elska hana.

Barton er þekktust fyrir hlutverk sitt sem Marissa Cooper í unglingaþáttunum The OC sem framleiddir voru á árunum 2003 til 2006. Hún hefur einnig leikið í fjölda Hollywood-kvikmynda, meðal annars The Sixth Sense og Notting Hill.

Í lokaþætti Nágranna sem sýndur var á síðasta ári sneru margir af fyrri persónum aftur, meðal annars Kylie Minogue, Guy Pearce og Jason Donovan.

Margir gamlir leikarar úr þáttunum munu halda áfram nú þegar framleiðsla hefst á ný, meðal annars Rebekah Elmaloglou (Terese Willis), Tim Kano (Leo Tanaka), Georgie Stone (Mackenzie Hargreaves) og Annie Jones (Jane Harris). Þá munu góðkunningjar eins og Ian Smith (Harold Bishop), Melissa Bell (Lucy Robinson) og April Rose Pengilly (Chloe Brennan) fara með gestahlutverk í nýju þáttunum.

Bíó og sjónvarp Ástralía Hollywood

Tengdar fréttir

Sápuóperur: 65 ár í sama hlutverkinu, stökkpallur og rokkari

Sápuóperur eiga það til að fanga hug og hjörtu aðdáenda sinna sem byrja að tengja við persónurnar sem fylgja áhorfendum í fjölda ára. Í tilefni þess að Nágrannar eru að segja skilið við skjáinn er tilvalið að líta til baka og sjá hvaða persónur hafa verið lengst á skjánum hjá þeim og í sambærilegum þáttum.

15. júní 2022 14:30

Staðfesta að framleiðslu Nágranna verður hætt í júní

Framleiðslu áströlsku sjónvarpsþáttanna Nágranna, eða Neighbours, verður hætt í júní næstkomandi. Þættirnir hafa verið í framleiðslu í heil 37 ár, en framleiðslufyrirtækinu Fremantle hefur ekki tekist að finna nýja breska sjónvarpsstöð til að fjármagna framleiðsluna eftir að Channel 5 tilkynnti að stöðin myndi draga sig úr framleiðslunni.

3. mars 2022 08:04