Urðunar­staður fundinn en verður haldið leyndum í bili

Rúmlega 700 kindur voru felldar á bænum á þriðjudag og hræjunum komið fyrir í sjö gámum. Upprunalega stóð til að urða hræin í landi Lækjarmóts, sem stendur í öðru sjúkdómsvarnarhólfi en Miðfjarðarhólfi, en bændur á bænum hættu við í gær eftir að hafa þurft að þola árásir þess efnis að þau væru að stofna lífsviðurværi sveitunga í hættu. Þegar var hafist handa við að finna annan urðunarstað og hefur það nú tekist.

70 tonn

Sigurborg Daðadóttir, yfirdýralæknir Matvælastofnunar, segir þau ekki gefa upp staðinn að svo stöddu.

„Við viljum bara ganga frá þessu fyrst, fá vinnufrið, keyra, moka yfir og ganga frá eins og á að gera þannig að smitvarnir séu tryggðar. Við viljum ekki að fólk sé að sniglast þarna í kring að óþörfu,“ segir Sigurborg. „Þetta er náttúrulega stór aðgerð í sjálfu sér, þetta eru um 70 tonn og það þarf að taka stóra gröf sem búið er að gera.“

Áætlað er að aðgerðum ljúki í dag en ekki sauðfjárrækt á jörðinni þar sem til stendur að urða hræin. Sigurborg segir það aldrei fyrsta kost að urða en það reynist nauðsynlegt þegar brennsla er ekki möguleg.

„Urðun er örugg leið út frá smitvarnarsjónarmiðum séð og það er búið að urða riðukindur á Íslandi í 150 ár, það eru ekki nema rétt um tíu ár síðan það var byrjað að brenna riðuhjarðir sem voru felldar,“ segir Sigurborg.

Miklar tilfinningar í spilinu

Íbúar í Miðfirði og bændur hafa lýst yfir mikilli óánægju með málið, frá upphafi til enda, enda mikið áfall bæði andlega og efnahagslega.

„Viðbrögðin eru bara skiljanleg, þetta eru miklar tilfinningar og þegar miklar tilfinningar eru uppi þá er erfitt að hugsa rökrétt og taka yfirvegaðar ákvarðanir hjá fólki. En við erum að vinna nákvæmlega eins og við höfum gert undanfarin ár og undanfarna áratugi,“ segir Sigurborg.

Aðspurð hvar rannsóknir standa á verndandi arfgerð gegn riðu segist Sigurborg hafa skrifað bréf til rektors Landbúnaðarháskólans og óskað eftir mati sérfræðingar þar. Vill hún fá þá til að leggja mat á það hvernig best væri að því staðið að rækta upp kindastofn sem ber verndandi arfgerð gegn riðu. 

„Ég nefndi þá í hvaða forgangsröð ég myndi vilja sjá það, þessa ræktun, og þar myndi ég beina spjótum mínum fyrst og fremst að þeim landsvæðum sem að hafa verið að berjast við riðu sem er viðvarandi vandamál, það er í Húnavatnssýslu á Skagafirði og það var vel tekið í það. Þannig ég reikna með að vinna sé farin af stað,“ segir Sigurborg og segist eiga von á niðurstöðu á næstu dögum. 

Mun taka mörg ár

Hún segir það taka mörg ár að rækta upp stofninn þar sem afar fátt fé ber arfgerðina. 

„En svo eru þarna arfgerðir sem eru hugsanlega verndandi og ef það tekst að sýna fram á það að þær séu verndandi þá tekur það skemmri tíma því að þá erum við með fleiri dýr til þess að nota í ræktunina. Þannig þetta verður bara allt að skoða í rólegheitum og á yfirvegaðan hátt en þó með eins miklum hraða og hægt er, en það verður að vanda til verka,“ segir Sigurborg.