Viktor í Val

Hinn 21 árs gamli Viktor kemur frá ÍR þar sem hann var hreint út sagt frábær á leiktíðinni sem ekki er enn lokið. Endaði hann sem fjórði markahæsti leikmaður Olís deildarinnar með 127 mörk í 22 leikjum.

„Við höfum fylgst með honum lengi enda með spennandi eiginleika sem leikmaður sem verður gaman að vinna með. Hann mun passa vel við okkar leikstíl og ekki skemmir fyrir að þetta er góður drengur sem talað er vel um upp í Breiðholti. Við hlökkum til að aðstoða hann í að bæta sig og ná markmiðum sínum hér að Hlíðarenda,“ sagði Snorri Steinn Guðjónsson, þjálfari Vals.

Valur stóð uppi sem deildarmeistari í ár en féll nokkuð óvænt úr leik gegn Haukum sem enduðu í 8. sæti í fyrstu umferð úrslitakeppninnar.