Virðist vera á leiðinni á Met Gala eftir allt saman

Met Gala er góðgerðarviðburður en um leið einn stærsti tískuviðburður ársins. Viðburðurinn fer alltaf fram á fyrsta mánudegi maí mánaðar á Metropolitian safninu í New York. Þar mætast listir, menning og tíska á óaðfinnanlegan hátt og stórstjörnur heimsins ganga rauða dregilinn í einhverjum dýrustu flíkum heims.

Aðeins vel valdar stórstjörnur fá boð á viðburðinn. Það er Anna Wintour, ritstjóri Vogue, sem stendur fyrir viðburðinum og setur saman gestalistann á hverju ári.

Talið að Kardashian systrum yrði ekki boðið

Erlendir fjölmiðlar höfðu greint frá því að Kardashian systur yrðu ekki á gestalista í ár. Á síðasta ári mættu þær þó allar og var það í fyrsta skipti sem allar systurnar fengu boð á viðburðinn. Nú er Wintour hins vegar sögð vera að skera niður gestalistann og var hávær orðrómur á lofti um það að Kardashian systur þyrftu að sitja hjá í þetta skiptið.

Kim Kardashian mætti eftirminnilega í kjól goðsagnarinnar Marilyn Monroe á viðburðinn á síðasta ári og olli uppátækið nokkru fjaðrafoki. Kim var ekki aðeins sögð hafa eyðilagt kjólinn, heldur var hún einnig gagnrýnd fyrir þær leiðir sem hún fór til þess að passa í kjólinn.

Hún þurfti að missa sjö kíló á þremur vikum en til þess segist hún hafa klæðst svitagalla tvisvar á dag, eytt miklum tíma á hlaupabrettinu, tekið út allan sykur, öll kolvetni og aðeins borðað hreint grænmeti og prótein.

Er í fullum undirbúningi fyrir Met Gala

Eftir kjólafíaskó síðasta árs og dvínandi vinsældir Kardashian fjölskyldunnar var talið að systrunum yrði ekki boðið á viðburðinn í ár. Það kom því mörgum á óvart þegar Kim birti myndir á Instagram í gær þar sem hún sýndi frá því að hún væri í fullum undirbúningi fyrir Met Gala.

Ekki er víst hvort öðrum Kardashian systrum hafi verið boðið en það kemur í ljós á mánudaginn.

„Eyddi smá tíma á skrifstofu Karl Lagerfelds til þess að fá innblástur fyrir Met Gala,“ skrifar Kim undir röð af myndum af sér ásamt ketti Lagerfelds.

Þess má geta að franski tískuhönnuðurinn Karl Lagerfeld er þema viðburðarins í ár. Lagerfeld var listrænn stjórnandi Chanel tískurisans. Hann lést úr krabbameini fyrir þremur árum síðan, þá áttatíu og fimm ára gamall.