Erdogan í góðri stöðu fyrir aðra lotu

Búið er að telja nánast öll atkvæði og er staðan þannig að Erdogan er með 49,42 prósent, Kilicdaroglu er með 44,95 prósent og Ogan með 5,2 prósent. Frambjóðandi þarf meira en helming atkvæða til að verða forseti og því verða haldnar aðrar kosningar.

Þá verða eingöngu þeir Erdogan og Kilicdaroglu í framboði en sú lota kosninganna fer fram þann 28. maí.

Erdogan leiðir Réttlætis- og þróunarflokkinn í Tyrklandi eða AKP. Hann er fæddur árið 1954 og hefur verið við völd í Tyrklandi í tvo áratugi. Hann varð fyrst forsætisráðherra árið 2003 en varð í kjölfarið forseti árið 2014. Hann mátti ekki verða forsætisráðherra aftur þar sem hann hafði setið þrjú kjörtímabili. AKP-flokkurinn beitti sér þá fyrir því að færa völd til forsetaembættisins og varð Erdogan kjörinn forseti.

Kannanir gáfu til kynna í aðdraganda kosninganna að Erdogan gæti tapað kosningunum og þá að miklu leyti vegna slæms ástands efnahags Tyrklands og vegna viðbragða ríkisstjórnar landsins við mannskæðum jarðskjálfta í febrúar.

Sjá einnig: Allar líkur á annarri um­ferð í for­seta­kosningunum í Tyrk­landi

Í kosningabaráttunni sakaði Erdogan Kilicdaroglu um að starfa með hryðjuverkamönnum og styðja „afbrigðileg“ réttindi hinsegin fólks. Forsetinn hækkaði einnig laun opinberra starfsmanna, lífeyrisgreiðslur og niðurgreiddi rafmagns- og gasreikninga, rétt fyrir kosningarnar.

Kilicdaroglu hét því að auka aftur málfrelsi í Tyrklandi og gera lýðræðisumbætur eftir langvarandi stjórnartíð Erdogan. Hann sagðist einnig vilja draga úr verðbólgu og bæta efnahagsástandið í landinu. Verðbólga í Tyrklandi mætist um 44 prósent en var um 86 prósent þegar mest var.

Erdogan hefur persónulegal verið kennt um háa verðbólgu í Tyrklandi en hann heldur því fram, þvert á hefðbundna þekkingu, að háir stýrivextir valdi verðbólgu og hefur beitt sér fyrir því að vextir séu lágir í Tyrklandi.

Hélt stuðningi víðast hvar

Svo virðist, samvkvæmt Al Jazeera, sem Erdogan hafi haldið vel í stuðning sinn víðast hvar í landinu. Hann fékk aðeins lægra fylgi en áður í suðausturhluta landsins, þar sem jarðskjálfti lék íbúa nýlega grátt og kvartað hefur verið yfir viðbrögðum ríkisstjórnar Erdogan. Forsetinn fékk þó meira fylgi þar en búist var við.

Þá fékk Erdogan mikið fylgi í borgum landsins en honum hefur í gegnum árin gengið hvað verst í þéttum byggðum Tyrklands.

Óvíst hvern Ogan styður

AKP og aðrir bandalagsflokkar á þingi virðast hafa haldið meirihluta sínum, sem bætir stöðu Erdogan fyrir aðra lotu kosninga. Erdogan dró þó verulega úr valdi þingsins og færði vald á hendur forseta árið 2017. AKP-samstarfið fékk 49,3 prósent og þar með 321 af sex hundruð þingsætum, bandalagið að baki Kilicdaroglu fékk 35,2 prósent og flokkur Kúrda fékk rúm tíu prósent atkvæða.

Erdogan gæti hagnast á þessari velgengni AKP í þingkosningunum þar sem kjósendur vilji forðast skipta ríkisstjórn.

Kilicdaroglu segist þó viss um sigur í seinni lotunni og heitir því að bæta lýðræði í Tyrklandi, sem Erdogan hefur lengi verið sakaður um að grafa undan. Kilicdaroglu segir að Erdogan hafi tapað trausti þjóðarinnar og kallað sé eftir breytingum.

Ogan mun ekki taka þátt í næstu lotu og hann hefur ekki sagt hvorn hinna hann muni styðja. AP fréttaveitan segir talið að stuðningsmenn hans vilji frekar breytingar en að Erdogan verði aftur forseti, en það er alls ekki víst.