Icelandair flýgur til Fær­eyja

Í fréttatilkynningu frá flugfélaginu segir að flugtími flugferða til Færeyja verði ein klukkustund og 45 mínútur og þar sem flogið er með morgunflugi frá Keflavíkurflugvelli þá tengist áfangastaðurinn mjög vel inn í leiðakerfi Icelandair í Keflavík. 

Einnig segir í tilkynningunni að Icelandair og færeyska flugfélagið Atlantic Airways hafi undirritað viljayfirlýsingu um samstarf enda liggi mikil tækifæri í að bjóða viðskiptavinum félaganna þægilegar tengingar á milli Færeyja og áfangastaða Icelandair í Evrópu og Norður-Ameríku.

„Færeyjar eru vaxandi áfangastaður og við finnum fyrir miklum áhuga á flugi þangað hjá viðskiptavinum okkar um allan heim. Tengsl Færeyinga og Íslendinga hafa alltaf verið mikil og okkar von er sú að með aukinni ferðatíðni muni þau tengsl og samvinna styrkjast enn frekar,“ sagði Bogi Nils Bogason, forstjóri Icelandair, í tilefni fréttanna.

„Hlutverk Atlantic Airways er að tengja Færeyjar umheiminum. Við höfum átt í góðu samstarfi við Icelandair um áratugaskeið og tengt Færeyjar við Ísland. Bandarískir ferðamenn eru vaxandi hópur og mikilvægur fyrir færeyska ferðaþjónustu og þessi viljayfirlýsing greiðir leiðina að því að tengjast betur Íslandi og öflugu leiðakerfi Icelandair til Bandaríkjanna og Evrópu,“ sagði Jóhanna á Bergi, forstjóri Atlantic Airways, um viljayfirlýsingu flugfélaganna.