Land­risið bendi til kraft­mikils goss

Þor­valdur segir erfitt að segja til um magn kviku á Reykja­nesinu þar sem jörð hefur nötrað í dag. Þá sé enn erfiðara að segja til um hve ná­kvæm­lega stórt gosið verður og hve­nær hugsan­lega gýs, þó meiri líkur séu á því en minni.

„En ef við tökum dæmi í þessu til­felli, þá erum við að tala um að það hefur orðið land­ris á til­tölu­lega stóru svæði á Reykja­nesi, á breiðu og út­dreifðu svæði með miðju í Fagra­dals­fjalli og eftir því sem svæðið sem verður fyrir á­hrifum af land­risi stækkar því meira verður rúm­málið á þeim vökva sem er að koma inn og valda land­risinu.“

Sé miðað við það sé hugsan­lega nægt kviku­magn undir jörð til þess að búa til til­tölu­lega stórt hraun­gos. „Þá stærra en þau sem komu upp 2021 og 2022. En hversu stórt það verður er erfiðara að segja til um.“

Aðrar sviðs­myndir mögulegar en 2021 og 2022

Þor­valdur segir að sama skapi erfitt að segja til um hvar gos muni koma upp. Miðað við hvar jarð­skjálftar finnist á Reykja­nesi, í beinni línu af gíga­röðinni sem myndaðist 2022, muni lík­lega gjósa þar í grenndinni

„Jörð gæti þess vegna opnast rétt norðan við Fagra­dals­klasann og þá svona inn af Þráins­skildi, sem væri að­eins öðru­vísi sviðs­mynd en við sáum í 2021 og 2022 gosinu. Því ef gos­sprungan opnast svona norðar­lega hefur hún flæði­að­gang í norður­átt, niður í áttina Kefla­víkur­veginum.“

Að þínu fræði­lega mati, hversu lík­legt telurðu að eld­gos geti orðið?

„Mér finnst líkurnar alltaf vera að aukast, eftir því sem að hrynan heldur á­fram. Þannig ég tel það séu veru­legar líkur á eld­gosi í þessu til­felli, sér­stak­lega þegar maður tekur til­lit til þess að skjálftarnir hafa eitt­hvað verið að grynnka. En það er erfiðara að segja til um hvort það sé eftir ein­hverja daga eða ein­hverjar klukku­stundir.“

Ekki bendi neitt til þess enn sem komið er að kvikan sé komin það grunnt að það styttist í gos. Ein­hver tími sé í það.

„En ef þetta heldur sem horfir þá held ég að þetta endi í eld­gosi,“ segir Þor­valdur sem bætir því við að sér­fræðingar læri eitt­hvað nýtt af hverju gosi. „Svo bara vonum við að þetta verði bara lítið og pent gos, sem leyfir okkur að fylgjast vel með.“