Icelandair gengur frá pöntun á allt að 25 Airbus A321XLR þotum

Enn á eftir að ganga fjármögnun kaupanna og hyggst Icelandair kanna fjármögnunarleiðir þegar nær dregur afhendingu. Þetta kemur fram í tilkynningu Icelandair til Kauphallar. 

Þetta er ekki einu Airbus farþegaþoturnar sem eru á leiðinni til flugfélagsins en það hefur nú náð samningum við SMBC Aviation Capital Limited, einn af núverandi flugvélaleigusölum Icelandair, um langtímaleigu á fjórum Airbus A321LR farþegaþotum sem áætlað er að verði afhendar á fjórða ársfjórðungi 2024. 

Bogi Nils Bogason, forstjóri Icelandair, segir í tilkynningu að A321XLR þoturnar komi til með að styrkja viðskiptalíkan Icelandair, auka sveigjanleika í rekstri og veita tækifæri á frekari vexti, auk þess að styðja við sjálfbærnivegferð flugfélagsins. 

Von sé á fyrstu A321XLR farþegaþotunni árið 2029 en hann geri ráð fyrir því að vera með fjórar Airbus A321LR þotur í rekstri fyrir sumarið 2025 nú þegar samið hefur verið við SMBC Aviation Capital Limited um leigu á flugvélunum.

Koma í stað Boeing 757

„Við erum ánægð og þakklát Icelandair fyrir traust sitt á Airbus og tökum stolt á móti flugfélaginu sem nýjum viðskiptavini. Við höfum fulla trú á því að framúrskarandi eiginleikar A321XLR muni styðja við sjálfbæran vöxt Icelandair og hjálpa félaginu að ná markmiðum sínum um minni útblástur,“ segir Christian Scherer, framkvæmdastjóri sölu- og markaðssviðs Airbus, í tilkynningu.

Icelandair vinnur nú að endurnýjun flugflotans og hefur gefið út að Airbus A321LR og A321XLR muni endanlega leysa Boeing 757 vélar félagsins af hólmi sem hafa þjónað því frá árinu 1990. Boeing 757, 767 og 737 MAX flugvélarnar munu halda áfram að gegna hlutverki í rekstri Icelandair á komandi árum.

Tækifæri Íslendinga til að komast í beint flug til fjarlægari áfangastaða gætu stóraukist með kaupunum á hinum langdrægu A321XLR en XLR stendur fyrir extra long range eða mjög langt flugþol. Kalifornía, Mexíkó, Texas og jafnvel Suður-Ameríka en einnig Indland og Norður-Afríka gætu þannig bæst í leiðakerfið.

Lækki rekstrarkostnað

Icelandair hefur sagt að Airbus flugvélategundirnar sem hér um ræðir búi bæði yfir mikilli drægni og séu af nýrri kynslóð sparneytnari og umhverfisvænni flugvéla.

„Þessar flugvélar eru með þeim hagkvæmustu sem völ er á og munu stuðla að lækkun rekstrarkostnaðar, styðja við loftslagsmarkmið Icelandair, og bjóða farþegum þægindi og ánægjulega upplifun. Vélarnar rúma um 190 farþega en til samanburðar rúma Boeing 757 flugvélar félagsins 183 farþega, Boeing 737 MAX-8 160 farþega og Boeing 737 MAX-9 178 farþega,“ sagði í tilkynningu í apríl.

„Airbus A321XLR flugvélin hefur allt að 8.700 kílómetra drægni sem gerir Icelandair kleift að nýta vélina á fjarlægari áfangastaði í núverandi leiðakerfi ásamt því að skapa tækifæri til þess að fljúga á nýja áfangastaði. Airbus A321LR flugvélin hefur allt að 7.400 kílómetra drægni sem gerir Icelandair kleift að nýta hana í núverandi leiðakerfi.“

Fréttin hefur verið uppfærð.