Stutt í ákvörðun Man. Utd um Greenwood

Frá þessu greina enskir fjölmiðlar í dag en óvissa hefur ríkt um það í eitt og hálft ár hvort að Greenwood spili á nýjan leik fyrir United eða ekki, þó að hann sé samningsbundinn félaginu til 2025.

Greenwood spilaði síðast fyrir United í janúar 2022, í 1-0 sigri gegn West Ham, en var handtekinn í sama mánuði.

Þessi 21 árs gamli Englendingur var svo ákærður í október í fyrra, meðal annars vegna tilraunar til nauðgunar og vegna líkamsárásar.

Allar ákærur voru hins vegar felldar niður í febrúar síðastliðnum eftir að lykilvitni dró sig til hlés og ný sönnunargögn komu fram, þar sem ekki þótti þá lengur raunhæfur möguleiki á sakfellingu.

Greenwood hefur ekki mætt á æfingar hjá United frá því að málið kom upp. Erik ten Hag, knattspyrnustjóri United, sagði við fjölmiðla í Bandaríkjaferð United að hann væri búinn að segja sína skoðun á málinu og að nú þyrfti félagið að taka ákvörðun.

Sú ákvörðun ætti að liggja fyrir á næstu dögum, eða í það minnsta áður en að United mætir Wolves 14. ágúst, og mun byggja á rannsókn félagsins sem ráðist var í eftir að ákærur gegn Greenwood voru felldar niður.