Segir Tottenham geta keypt Kane til baka

Félagaskipti Harry Kane frá Tottenham til þýsku meistaranna í Bayern Munchen voru án efa þau umtöluðustu í sumar. Þýska félagið borgaði um 100 milljónir punda fyrir Kane sem hefur farið vel af stað með sínu nýja félagi.

Daniel Levy eigandi Tottenham fékk gagnrýni frá stuðningsmönnum fyrir að hafa hleypt Kane til Þýskalands. Kane átti aðeins eitt ár eftir af samningi sínum við Spurs og hefði því getað yfirgefið félagið frítt næsta sumar.

Á þriðjudagskvöld blandaði Levy sér í umræðu á stuðningsmannaspjalli stuðningsmanna Tottenham. Þar var hann spurður hvort klásúla væri í samningi Tottenham og Bayern um að enska liðið gæti keypt hann til baka.

„Að sjálfsögðu,“ svaraði Levy án þess að fara nánar út í klásúluna sjálfa. Samkvæmt Sky Sports á Tottenham forkaupsrétt á Kane ef hann ákveður að snúa aftur í ensku úrvalsdeildina.

Þegar Kane yfirgaf Tottenham í lok ágúst neitaði hann að útiloka endurkomu til félagsins í framtíðinni. Kane mun að öllum líkindum leika sinn fyrsta Meistaradeildarleik fyrir Tottenham í kvöld þegar liðið mætir Manchester United á Allianz leikvanginum í Þýskalandi. United var eitt þeirra liða sem orðað var við Kane í sumar.

„Þú þarft að læra af mistökunum“

Í samtali sínu við stuðningsmenn ræddi Levy einnig núverandi knattspyrnustjóra liðsins Ange Postecoclu og skaut létt á Jose Mourinho og Antonio Conte sem eru forverar Postecoglu í starfi.

„Ange er venjulegur náungi og það er frábært að eiga samtal við hann. Hann var mjög beinskeyttur, heiðarlegur og ég kann vel við menn sem segja mér hvernig hlutirnir eru. Ekki einhver sem spilar leiki og segir eitt en meinar annað. Ég er ekki að tala um einhvern ákveðinn aðila,“ sagði Levy og hélt áfram.

„Félagið þurfti að leita aftur til rótanna. Það var pressa á mér að ráða eitthvað stórt nafn en ég vildi færa félagið nær eigin kjarna. Einhvern sem myndi spila sókndjarfan fótbolta, sem myndi gefa ungum leikmönnum tækifæri og hafa trú á akademíunni, byggja upp samband við stuðningsmenn, skilja hvernig við vinnum og vera hluti af liðinu. Ange er ferskur andvari fyrir okkur,“ sagið Levy.

Jose Mourinho og Antonio Conte eru meðal þeirra sem hafa verið við stjórnvölinn hjá Tottenaham á síðustu árum en litlum árangri náð. 

„Við fórum í gegnum tímabil þar sem við unnum næstum því með Mauricio Pochettino, það voru góðir tímar. Við komumst ekki alla leið en vorum nálægt því. Þá breyttum við um taktík og ákváðum að sækja „bikarþjálfara“. Við gerðum það tvisvar og þú þarft að læra af mistökunum,“ en bæði Mourinho og Conte höfðu raðað inn bikurum áður en þeir tóku við Tottenham.