Á­kærður fyrir ó­lög­legan vopna­flutning á Akur­eyri

Ákæran er birt í Lögbirtingablaðinu en brotið var framið við heimili mannsins á Akureyri aðfararnótt 3. júlí 2021.

Í ákæru segir að maðurinn hafi umrætt sinn verið undir áhrifum áfengis við flutning skotvopna. Hafi hann verið að flytja til skotvopn og skotfæri, án þess að tryggja viðeigandi og áskilda geymslu þeirra í aðskildum og læstum hirslum þar sem óviðkomandi næði ekki til þeirra. Hann hafði þá geymt skotvopnin og skotfærin í töskum undir rúmi á heimili sínu.

Athæfi mannsins er talið brjóta gegn ákvæðum vopnalaga sem fjalla um geymslu skotvopna og svo meðferð þeirra undir áhrifum áfengis- og vímuefna.

Fram kemur að maðurinn sé nú búsettur á ótilgreindu heimilisfangi í Danmörku og sé hann kvaddur til að koma fyrir dóm þann 25. október næstkomandi. Sæki hann ekki þing megi hann búast við því að fjarvistin verði metin til jafns við það að hann viðurkenni að hafa framið brotið sem hann er ákærður fyrir. Verði dómur þá lagður á málið að honum fjarstöddum.